Атырау облысында тәртіптік жазадан ерте құтылған әкім 650 мың теңгеден астам сыйақы алған

Атырау облысы бойынша Мемлекеттік қызмет істері департаментінің Әдеп жөніндегі кеңес отырысында тәртіптік жаза мерзімінен бұрын негізсіз алынып тасталған әкім туралы белгілі болды, деп хабарлайды "Ақ Жайық" басылымы.

Басылымның мәліметінше, Индер ауданы әкімдігінің лауазымды тұлғалары Есбол ауылдық округінің әкімі Абзал Рамазановтан белгіленген тәртіптік жазаны мерзімінен бұрын негізсіз алып тастағаны анықталды.

Нәтижесінде оған 656 609 теңге мөлшерінде заңсыз сыйақы төленген.

Әдеп жөніндегі кеңес ақшаны бюджетке қайтару және тиісті лауазымды тұлғаларды тәртіптік жазаға тарту туралы ұсыныс жасады.

Айта кетейік, дәл осы отырыста Атырау облысы бойынша тексеру комиссиясының басшысы Равиль Төлебаевқа қатысты тәртіптік іс қаралған еді.

Оған ұжымда іскерлік және достық қарым-қатынас орната алмағанына байланысты қатаң сөгіс түріндегі тәртіптік жаза қолдану ұсынылды.

Мәтіннен қате тапсаңыз, бізге жазыңыз