Елімізде журналистерге шабуыл ұйымдастырды деген күдікпен ер адам ұсталды (видео)

Қазақстанда журналистерге шабуыл жасау деректерін тексеріп жатқан полицейлер бұған қатысты күдіктіні ұстады, деп хабарлайды Polisia.kz ақпараттық медиа-порталы.

Ведомство ақпаратынша, ІІМ мен ҰҚК ведомствоаралық жедел-тергеу тобы редакциялар мен БАҚ өкілдеріне жасалған шабуылдар дерегі бойынша қылмыстық істі тергеуді жалғастыруда.

"Журналистерге жасалған шабуылдарды ұйымдастырушы және бастамашы болған Қазақстан азаматы екені анықталды. Ол ұсталды және соттың рұқсатымен қамауға алынды", - дейді ІІМ өкілдері.

Күдіктіге мынадай баптар бойынша қылмыс жасады деген айып тағылып отыр:

• Қылмыстық кодекстің 115 бабы “Қауіп-қатер”,
• Қылмыстық кодекстің 147 бабы “Жеке өмірге қолсұғылмаушылықты бұзу”,
• Қылмыстық кодекстің 158 бабы “Журналистік қызметке кедергі жасау”,
• Қылмыстық кодекстің 202 бабы “Бөтен мүлікті қасақана жою немесе бүлдіру”
• Қылмыстық кодекстің 293 бабы “Бұзақылық”.

"Ұсталған адам істеген әрекетін мойындады. Жауап алу барысында ол барлық шабуылды өз бетінше ұйымдастырғанын, бірқатар қазақстандық танымал БАҚ өкіліне бұрынғы талаптары болғанын мәлімдеді", - делінген ведомство сайтында.

Тексеру кезінде күдікті құқыққа қайшы жоспарларын іске асыру үшін хакерлер тобы мен акцияларды орындаушыларды жалдағаны анықталды. Сондай ақ арандату жұмыстарын ұйымдастырып, орындаушыларға берілетін қаражатты криптовалюта операциясынан түскен пайда есебінен төлеп отырғаны белгілі болды.

Ведомство тергеу жалғасатынын, оның нәтижелері туралы қосымша хабарланатынын мәлімдеді.

Мәтіннен қате тапсаңыз, бізге жазыңыз