Бұрынғы мәжіліс депутаты Нұржан Әлтаев қамауға алынды

Бұрынғы мәжіліс депутаты Нұржан Әлтаев қамауға алынды. Бұл туралы Астана соттары Facebook парақшасында хабарлады.

"2023 жылғы 9 маусымда Астана қаласы мамандандырылған ауданаралық тергеу соты күдікті Нұржан Әлтаевқа қатысты 2 ай мерзімге күзетпен ұстау түріндегі бұлтартпау шарасын санкциялады", - делінген хабарламада.

Еске сала кетсек, 7 маусымда Нұржан Әлтаевтың ұсталғаны белгілі болған еді. Антикордың баспасөз қызметі бұл ақпаратты растап, оның ірі көлемде пара алды деген күдікпен ұсталғанын хабарлады.

Кейінірек, агенттік Әлтаевтың Еңбек және әлеуметтік қорғау вице-министрі, кейіннен парламент мәжілісінің депутаты ретінде жүйелі негізде "Атамекен" Ұлттық кәсіпкерлер палатасының басқарма төрағасы А.И. Мырзахметовтен аса ірі мөлшерде пара алды деген күдікке ілінгенін мәлімдеді.