Жамбыл облысында кәсіпкер сібір жарасын жұқтырған малдың етін сатқан

Жамбыл облысында кәсіпкер сібір жарасын жұқтырған малдың етін сатқаны үшін жазаланды. Бұл туралы KAZ.NUR.KZ тілшісі облыстық соттың сайтына сілтеме жасап хабарлайды.

Ведомство мәліметінше, Талас аудандық соты ӘҚБтК-нің 425-бабы 2-бөлігі (Халықтың санитариялық-эпидемиологиялық саламаттылығы саласындағы заңнама талаптарын, сондай-ақ гигиеналық нормативтердi бұзу) бойынша жеке кәсіпкер  С.-ға қатысты әкімшілік іс қаралған.

Сотта 2023 жылдың тамыз айында ет өнімдерін сатумен айналысатын кәсіпкер сібір жарасымен ластанған етті өткізіп, сол арқылы халықтың санитариялық-эпидемиологиялық салауаттылығы саласындағы заңнама талаптары, сондай-ақ гигиеналық нормативтерді бұзғаны анықталды. Осылайша ол адам денсаулығына зиян келтірген.

Сотталушы өз кінәсін толығымен мойындады.

"Сот қаулысымен кәсіпкер С. ӘҚБтК-нің 425-бабы 2-бөлігі бойынша кінәлі деп танылып, оған 1 млн теңгеден астам сомада айыппұл салынды", - делінген хабарламада.

Қаулы заңды күшіне енген жоқ.

Мәтіннен қате тапсаңыз, бізге жазыңыз