Шымкент тұрғыны 4 жыл бойы алимент төлемей, 7 млн теңгеге жуық қарызға батқан

4 жыл бойы алимент төлемей келген Шымкент тұғынының берешегі 6,8 млн теңгеге жеткен. Бұл туралы KAZ.NUR.KZ қалалық прокуратураның сайтына сілтеме жасап хабарлайды.

Ведомство мәліметінше, Еңбекші ауданы прокуратурасы талдау нәтижесінде 4 жыл ішінде дәлелді себепсіз алимент бойынша 6 838 670 теңге соммасына берешегін өтемеген борышкерді анықтаған. Борышкер сот шешімін тиісінше орындамағаны үшін бірнеше рет әкімшілік жауапкершілікке тартылған.

Аудан прокуратурасы биыл 10 шілдеде аталған факт бойынша ҚР ҚК 139-бабымен сотқа дейінгі тергеп-тексеруді бастаған.

Прокуратура алимент төлеуден жалтарған борышкерлерге ҚР ҚК-нің 139-бабына сәйкес 2 жылға бас бостандығынан айыру жазасы көзделгенін ескертеді.

Еске салайық, 5 жастағы баласына алимент төлемей келген Павлодар облысының тұрғынына 1 миллион теңгедей айыппұл салынған еді.