"45 млн теңгеге алаяқтық жасады": қазақстандық азамат Польшадан экстрадицияланды

Қазақстан Бас прокуратурасы, ішкі істер министрлігі және сыртқы істер министрлігі бірлесіп, аса ірі көлемде алаяқтық жасады деген күдікті - Қазақстан азаматын Польшадан экстрадициялады, деп хабарлайды Бас прокуратура Telegram-дағы ресми арнасында.

Қазақстан азаматы 2023 жылы Польшадан екі жүк көлігін алып келуге уәде беріп, жәбірленушінің 45 миллион теңге көлеміндегі қаражатын иемденіп, міндеттемелерін орындамай, иемденген қаражатпен жасырынған деген күдікке ілінген.

"Биыл ақпанда ол Бодзентын қаласында ұсталып, Қазақстан Республикасы Бас прокуратурасының сұрау салуы бойынша Отанына экстрадицияланды. Қазіргі уақытта ұстау изоляторына қамаққа алынды. Айыпталған қылмысты жасағаны үшін мүлкі тәркіленіп, бес жылдан он жылға дейінгі мерзімге бас бостандығынан айыру жазасы қарастырылған", - делінген хабарламада.