Астана әуежайында орынсыз қалжыңдаған шетел азаматы 15 тәулікке қамалды

Астанада Түркия азаматы жалған ақпарат бергені үшін ұсталды, деп хабарлайды KAZ.NUR.KZ Көліктегі Полиция департаментінің баспасөз қызметіне сілтеме жасап.

Ведомствоның Instagram желісінде жариялаған мәліметіне сүйенсек, Астана әуежайында 47 жастағы Түркия азаматы қалжыңдап, өзімен бірге тыйым салынған заттар бар екенін айтқан.

"Ақпарат расталмағанымен, бұл тіркеу процесін тоқтатып, жолаушыларды алаңдатты. Ер адам 15 тәулікке қамалды", - делінген хабарламада.

Полицейлер жолаушыларға қауіпсіздікке қатысты әзіл – жауапкершілікке әкелетін әрекет екенін ескертеді.

Еске сала кетейік, бұған дейін Астана әуежайында Астана-Өскемен рейсінің 47 жастағы жолаушысы ұсталғанын хабарлағанбыз. Ол алкогольге мас күйде бортсеріктің ішінен ұрып, ұшақ бортынан шығарда "бомба" деп айқайлаған еді.

Сондай-ақ Алматы әуежайында қолына пышақ ұстаған ер адам әуе айлағының қызметкерін пышақпен қорқытып, елді дүрліктірген болатын.