Жүздеген тонна қолданылған шина Қазақстанға заңсыз әкелінген: прокуратура өкілдері мәлімдеме жасады

Қазақстанның Бас көлік прокуратурасы тексеру жүргізіп, қолданылған шиналарды заңсыз әкелетіндерді анықтады, деп хабарлайды KAZ.NUR.KZ ведомствоның ресми сайтына сілтеме жасап.

Қазақстанның кеден заңнамасы мен Еуразиялық экономикалық одақтың нормалары денсаулық пен экологияға қауіпті тауарлардың әкелінуін қатаң реттейді. Олардың қатарына — тек арнайы рұқсат болған жағдайда ғана әкелуге рұқсат етілетін, қолданылған автокөлік шиналары да кіреді.

Алайда Бас көлік прокуратурасының өкілдері тексеру барысында кейбір сыртқы экономикалық қызметке қатысушылардың бұл тыйымды айналып өтіп, қолданылған шиналарды дөңгелек дискілерімен бірге әкелетінін анықтады.

"Мәселен биыл сәуір-маусым айларында бір өңірде салмағы 1,5 мың тоннаға жуық қолданылған шиналардың 159 заңсыз әкелу дерегі тіркелді. Тағы бір өңірде өткен жылдары 200 тоннадан астам осындай өнім әкелінген.

Мұндай шиналар қауіпті қалдықтар ретінде жіктеледі, оларды пайдалану жол қозғалысы қауіпсіздігіне және қоршаған ортаға қауіп төндіруі мүмкін", - делінген хабарламада.

Прокуратураның араласуынан кейін Мемлекеттік кірістер комитеті бақылауды күшейтіп, тәуекелдерді басқару жүйесіндегі шараларды жаңартқан. Құқық бұзушылықтарды анықтау жұмысы жүріп жатыр.

Мәтіннен қате тапсаңыз, бізге жазыңыз