Ақтөбе облысында 77 жүк көлігін заңсыз бастапқы тіркеуден өткізді деген топ қамауға алынды

Ақтөбе облысында жүк көліктерін заңсыз тіркеумен айналысты деген топтың әрекеті әшкере болды. Бұл туралы KAZ.NUR.KZ Қаржы мониторингі агенттігіне сілтеме жасап хабарлайды.

Агенттіктің мәліметінше, ұйымдасқан қылмыстық топ қатысушылары жалған сатып алу-сату шарттарын, көлік құралдарын тексеру туралы жалған актілерді қолданып, "Автоіздеу" ақпараттық жүйесіне шындыққа сәйкес келмейтін мәліметтер енгізу арқылы 77 жүк көлігін бастапқы тіркеуден өткізген.

"Аталған заңсыз әрекет Ақтөбе, Атырау және Батыс Қазақстан облыстарының аумағында салық заңнамасында белгіленген рәсімдерді әдейі айналып өту үшін жүргізілген. Бастапқы тіркеу алымдарын төлемеу салдарынан мемлекетке келген жалпы залал 740 млн теңгеден асты", - делінген хабарламада.

Сот шешімімен ұйымдастырушылар қамауға алынды.

Сотқа дейінгі тергеп-тексеру амалдары жүріп жатыр. Қылмыстық-процестік кодекстің 201-бабына сәйкес, тергеу мүддесіне байланысты өзге ақпарат жарияланбады.

Мәтіннен қате тапсаңыз, бізге жазыңыз