Алматы облысында жүгері алқабында жасырын есірткі өсірген азамат ұсталды

Алматы облысының полицейлері заңсыз кәсіппен айналысқан ер адамды ұстады. Күдікті жүгері алқабының арасына жасырын есірткі өсірген, деп хабарлайды ІІМ-нің ресми сайтына сілтеме жасаған KAZ.NUR.KZ.

Есірткі қылмысына қарсы іс-қимыл басқармасының қызметкерлері ҰҚК департаментімен бірлесіп Еңбекшіқазақ ауданында арнайы операция жүргізді. Нәтижесінде 36 жастағы жергілікті тұрғын ұсталып, полиция бөліміне жеткізілді.

Тексеру барысында жалпы аумағы 4,5 гектарды құрайтын шаруа қожалығының жерінен жасырын плантация анықталды. Полицияның мәліметінше, эүгері алқабының арасында 233 түп қарасора егілген. Оған қоса арнайы жасырылған жерден марихуана тұқымдары салынған 58 пробирка тәркіленді.

"Тәркіленген өсімдіктер сот-химиялық сараптамаға жолданды. Сараптама қорытындысына сәйкес, олардың жалпы салмағы 49 келіден асты. Қазіргі таңда күдікті Шелек қаласының полиция бөліміне жеткізіліп, оған қатысты қылмыстық іс қозғалды", – деді полиция өкілдері.

Мәтіннен қате тапсаңыз, бізге жазыңыз