Семейде стендап-блогер 5 тәулікке қамауға алынды

Семейде стендап-шоу кезінде бейәдеп сөздер айтқан стендап-блогер 5 тәулікке әкімшілік қамауға алынды, деп хабарлайды Абай облыстық ПД-ға сілтеме жасаған KAZ.NUR.KZ.

Полицияның мәліметінше, 2025 жылғы 22 қарашада кешкі сағат 21:00 шамасында Семей қаласындағы мейрамханалардың бірінде өткен стендап-шоуда өнер көрсеткен жергілікті блогер көпшілік алдында бейәдеп сөздер айтқан.

Шоудың видеосы әлеуметтік желілерде таралып, қоғамда қызу талқыға түскен.

Полиция қызметкерлері жарияланған видеоматериалды зерделеп, стендап-блогерді қоғамдық орында бейәдеп сөздер айтқаны үшін әкімшілік жауапкершілікке тартқан.

Сот әкімшілік істі қарап, блогерді 5 тәулік мерзімге әкімшілік қамауға алу туралы шешім қабылдаған.

Абай облыстық полициясы көпшілік алдында өтетін іс-шараларда, соның ішінде әзіл-сықақ бағдарламаларында қоғамдық мораль нормаларын сақтау керектігін еске салды.

"Қоғамдық ортада бейәдеп сөздер айту, сондай-ақ оны интернет арқылы тарату заңға қайшы келеді және құқықтық жауапкершілікке әкеледі.

Осындай құқық бұзушылықтарға қатысты полиция қажетті шаралар қабылдайды. Қоғамдық тәртіпті бұзатын әрекеттер назардан тыс қалмайды", - делінген хабарламада.

Мәтіннен қате тапсаңыз, бізге жазыңыз