Төтенше жағдайлар вице-министрі БҚО-дағы тікұшақ апатына не себеп болуы мүмкін екенін айтты

Төтенше жағдайлар вице-министрі Мереке Пішембаев сенат кулуарында Батыс Қазақстан облысында 4 адам қаза тапқан тікұшақ апатына себеп болуы мүмкін жағдайлардың бірін айтты, деп хабарлайды KAZ.NUR.KZ.

"Тікұшақ жаңа – бір жыл ғана қолданыста болған. Сондықтан оның техникалық жағдайы жақсы болғаны даусыз", – деді Пішембаев.

Оның айтуынша, қазір Авиация әкімшілігі, "Қазавиақұтқару" қызметкерлерінің қатысуымен комиссия құрылып, тергеу жүріп жатыр.

"Апатқа себеп болған нұсқалардың бірі – ауа райының қолайсыздығынан болуы мүмкін. Әзірге нақты қандай ауа райы жағдайы екенін айта алмаймын. Нәтижесін комиссия жұмысы аяқталған соң береміз", – деп түйіндеді спикер.

Еске сала кетейік, 23 ақпанда "ҚазТрансОйл" АҚ тапсырысымен құбырды тексеру бойынша ұшып шыққан "Қазавиақұтқару" Ми-8 тікұшағы апатты жағдайда қонып, салдарынан тікұшақтағы 4 адамның мерт болғанын хабарлаған едік.

Азаматтық авиация комитетінің ақпаратынша, тікұшақ сағат 15:50-де БҚО-ның Чапурино елдімекенінен 6 шақырым қашықтықта қатты екпінмен келіп қонған. Бортта 5 экипаж мүшесі және 2 жолаушы болған.

Қазіргі таңда тікұшақ апатына байланысты Көліктегі полиция департаменті Қылмыстық кодекстің 344-бабының 3-бөлігі (абайсызда екi немесе одан да көп адамның өлiмiне әкеп соққан әуе көлiгi жүрісі немесе оларды пайдалану қауiпсiздiгi қағидаларын бұзу) сотқа дейінгі тергеуді бастаған.

Мәтіннен қате тапсаңыз, бізге жазыңыз