"Неден уланғаны белгісіз": Шымкентте құтқарушылар бір отбасыны аман алып қалды

Шымкент қаласы Төтенше жағдайлар департаментінің жедел-құтқару жасағының құтқарушылары бір отбасыны аман алып қалды, деп хабарлайды Шымкент қалалық ТЖД Instagram-дағы ресми парақшасында.

ТЖД мәліметінше, 23 сәуір күні құтқару қызметінің "112" телефон нөміріне бір тұрғын хабарласып, туыстары есік ашпай жатқанын айтқан.

Оқиға орнына барған құтқару бөлімшесінің мамандары арнайы құралдармен пәтердің есігін ашып, ішінен 6 адамды сыртқа, қауіпсіз жерге шығарған.

Үйден 1987 жылғы азаматша, 2005 және 2003 жылы туған қыздар, 2011, 2013, 2015 жылғы ер балалар құтқарылған.

"Құтқарушылар зардап шеккендерді таза ауаға шығарып, алғашқы медициналық көмек көрсетіп, жедел жәрдем қызметкерлеріне тапсырды. Улану себептері анықталуда, сот-медициналық сараптама тағайындалды", – дейді Шымкент қаласы ТЖД қоғаммен байланыс тобының өкілдері.

Мәтіннен қате тапсаңыз, бізге жазыңыз