Ақмола облысында болмаған ТЖ салдарын жою үшін миллиондаған қаржы бөлінген

Біржан сал ауданы әкімдігі төтенше жағдайдың салдарын жою үшін 3 миллион теңге бөлген. Алайда ауданда төтенше жағдайлар жарияланбаған. Бұл туралы Ақмола облысының прокуратурасына сілтеме жасаған KAZ.NUR.KZ хабарлайды.

Қадағалаушы органның ресми сайтында жарияланған ақпаратқа сүйенсек, Біржан сал ауданының прокуратурасы мемлекеттік сатып алу саласындағы заңдылықтың сақталуына талдау жүргізу барысында жергілікті атқарушы орган қызметтік автокөліктер мен ғимараттарға жөндеу жұмыстарын жүргізуге конкурс өткізбей, бір көзден мемлекеттік сатып алу туралы 3 шарт жасағанын анықтаған. 3 млн теңгеден астам сомаға шарт жасалған.

Конкурс өткізбеу себебі ретінде төтенше жағдай салдарын жою қажеттілігін көрсеткен.  

"Алайда, прокурорлардың анықтауынша, Біржан сал ауданының аумағында төтенше жағдайлар жарияланбаған, яғни мемлекеттік сатып алу туралы шарттар негізсіз жасалған", - делінген хабарламада.

Прокурорлық қадағалау актісін қарау нәтижесінде лауазымды тұлға айыппұл түрінде әкімшілік жауапкершілікке тартылды.

Мәтіннен қате тапсаңыз, бізге жазыңыз