Астанадағы "Биг Шанхай" базарындағы өрт: үш өрт сөндіруші зардап шеккен

Өткен түнде Астанадағы "Биг Шанхай" базары аумағында болған өрт салдарынан үш өрт сөндіруші зардап шегіп, олардың бірі ауруханаға жатқызылған, деп хабарлайды "ҚазАқпарат" ХАА.

Агенттіктің жазуынша, өткен түнде Астанада Байқоңыр ауданы Алаш тас жолының бойындағы үш қабатты базар ғимараты өртке оранған.

Астана Төтенше жағдайлар департаменті басшысының орынбасары Қанат Алтынбековтың айтуынша, алғашқы бөлімдер келген кезде өрт ғимараттың үш қабатын түгел шарпып үлгерген.

"Тепловизор мәліметтері бойынша сыртқы қабырғалардың температурасы 800 градустан асқан. Ішінде не болғанын елестетіңіз. Құрылымдардың опырылуы және өртті сөндіру барысында үш қызметкеріміз жарақат алды. Олардың біреуі бас жарақатын алып, ауруханаға жатқызылды", - деді Қанат Алтынбеков.

Өртті сөндіруге Астана қаласы ТЖД және ЖАО 165 адам, 62 бірлік техникасы жұмылдырылған.

Қабылданған шаралардың нәтижесінде өрт сағат 07:10-да оқшауланған.

Мәтіннен қате тапсаңыз, бізге жазыңыз