"Шашымнан жұлып, тепкіледі": Қостанайда фельдшерді ұрып-соғу оқиғасына қатысты бас дәрігер мәлімдеме жасады

Қостанай облыстық жедел медициналық жәрдем станциясы өкілі фельдшерге жасалған шабуылдың мән-жайын баяндады. Бұл туралы KAZ.NUR.KZ хабарлайды.

Жедел жәрдем станциясы бас дәрігерінің міндетін уақытша атқарушы Давид Саркисян оқиғаға қатысты өзінің Instagram-дағы парақшасында ресми түсініктеме берді.

Оның айтуынша, қоңырау 17 желтоқсан күні сағат 23:00 шамасында түскен. Қоңырау шалушылар ентігу мен жүрек ауыруына шағымданған. Саркисянның айтуынша, дәрігерлер оқиға орнына 4-5 минут ішінде жеткенімен, оларды о баста ашуға мінген науқастың туыстары қарсы алған.

Тексеру барысында науқастың тыныс алуы тоқтағаны анықталып, жедел жәрдем қызметкерлері дереу реанимациялық шараларға кіріскен.

"30 минут бойы реанимациялық көмек көрсетілді. Алайда, өкінішке қарай, нәтиже болмады. Науқастың биологиялық өлімі тіркелді. Осы кезде науқастың туыстары, әсіресе екі қызы, фельдшерлерге айғайлап, балағат сөздер айтып, физикалық күш қолданатындарын ескертті.

Өкінішке қарай, өлім расталған кезде біздің қызметкерлерге шабуыл жасалды. 24 жастағы фельдшер қыздың бетіне соққы жасалып, шашы жұлынып, басқа да дене жарақаттарын алды", - деді ол.

NUR.KZ тілшісіне Қостанай облысы денсаулық сақтау басқармасының баспасөз қызметі Дэвид Саркисян спикер ретінде сөйлеген тағы бір видео жіберді. Онда ол жоғарыда айтылғандарға фельдшер ауруханада емделіп жатқанын, оның миы шайқалып, басқа да ауыр жарақат алғанын атап өткен.

Зардап шеккен екінші қызметкер амбулаторлық емдеуге жіберілген, ауруханаға жатқызуды қажет етпеген. Іс құқық қорғау органдарына жіберілді.

Бұған дейін Қостанайда жедел жәрдем фельдшері қайтыс болған әйелдің туыстары жабылып ұрғанын мәлімдеген болатын. Полиция қылмыстық іс қозғап, сараптама тағайындады.