Қарағандыда жеке емханада ота кезінде ер адам қайтыс болды

Қарағандыдағы жеке клиникалардың бірінде ер адам операция үстелінде қайтыс болды. Бұл туралы марқұмның әйелі әлеуметтік желіде хабарлады. Ол жеке емхананы тексеруді сұрайды, деп хабарлайды KAZ.NUR.KZ.

Instagram желісінде емханада қайтыс болған науқастың әйелінің мәлімдемесі пайда болды. Ол күйеуі Вячеслав Е.-ның жекеменшік емханада асқазан резекциясына ота жасалғанын айтты. Алайда операция кезінде жары қайтыс болған көрінеді.

"Клиника маған оның өлімінің себептері туралы әлі күнге дейін ешқандай түсініктеме берген жоқ. Менің күйеуім қайтыс болғаннан кейін оның денесін менің келісімімсіз, полицияға хабарламай жеке мәйітханаға апарып тастаған. Полиция қызметкерлері де мәйітті оқиға орнынан заңсыз алып, белгісіз жаққа алып кеткеніне күмән білдірді" - деп жазды әйел.

Оның айтуынша, емхананың бас дәрігері пациент қайтыс болған жерді тексеру үшін, мәйітті мәйітханаға сараптамаға жібермес бұрын полиция шақыруы керек еді.

"Операцияға дайындық қалай жүргізілгені, бала кезіндегі қант диабеті, қан қысымы, гепатит және т.б. аурулары бола тұра, дәрігерлердің қайсысы операцияға ұсыныс бергені әлі күнге дейін белгісіз. Дәрі-дәрмектерге, соның ішінде анестезияға аллергиялық сынақ жүргізілді ме, жоқ па, белгісіз. Өйткені менің білуімше, ол анестезияны енгізгеннен кейін тыныс алуды тоқтатты. Реанимациялық шаралар да қалай жүргізілгені белгісіз" - деп жазған марқұмның әйелі.

Ол күйеуінің қайтыс болғаны туралы оған хабарланбағанын және марқұмның денесі мәйітханаға ешкімнің рұқсатынсыз жеткізілгенін айтады.

"Мен біздің отбасымыз үшін осы қиын жағдайда шындықты білу үшін шапқылап жүруге мәжбүр болдым. Күйеуімнің мәйіті белгісіз мәйітханаға жеткізілгенін білген полиция қызметкерлері дереу әрекет етіп, тиісті сараптамалар жүргізіп, мән-жайды анықтауға кірісті" - деп жазды әйел.

inform.kz ақпараттық агенттігінің хабарлауынша, полиция өлімге қатысты іс қозғаған. Мәйіт сот-медициналық сараптамаға жіберілді.

"Медицина немесе фармацевтика қызметкерінің абайсызда адам өліміне әкеп соққан кәсіби міндеттерін тиісінше орындамау фактісі бойынша сотқа дейінгі тергеу амалдары басталды" - деп хабарлады Қарағанды облысының полиция департаментінің баспасөз қызметінің өкілі.

Еске салайық, 2023 жылдың желтоқсан айында Қарағанды облысында 40 жастағы ер адам антибиотик қабылдағаннан кейін анафилактикалық шоктан қайтыс болды. Ер адамның туыстары оның дәрігерлерге препаратқа аллергиясы барын ескерткенін, бірақ олар бәрібір қауіпті дәріні енгізгенін айтты.

Қаңтар айында Қарағанды облысы бойынша Медициналық және фармацевтикалық бақылау департаменті ауруханада тексеру жүргізіп, содан кейін препаратты енгізген медбике жұмыстан шеттетіліп, ауруханада қайтыс болған ер адамның емдеуші дәрігері жұмыстан босатылды.