RU

АҚШ-тағы Ажал аңғарында ауа температурасы 56,7 градусқа дейін көтерілді

Термометр
Көрнекі фото: pixabay.com

АҚШ-тың орталық және оңтүстік-батысында аптап ыстық болуда деп хабарлайды "Хабар 24".

Калифорния штатындағы Ажал аңғарында ауа температурасы 56,7 градусқа дейін көтерілген. Жанып тұрған күн райынан аймақтағы орманды алқап пен ландшафт зардап шегуде.

Мамандар орман өрті жиі тіркеле бастағанын айтады. Ұлттық метеорологиялық қызметінің өкілдері 46 млн тұрғынды барынша сақ болуға шақырады. Бұған қарамастан аймақтағы саябақтарға ағылған туристердің легі азайған емес.

Айта кетейік, Ажал аңғарындағы ең ыстық температура 1913 жылы 57 градусқа көтерілген еді. Мамандар "биыл бұл көрсеткіш жаңаруы мүмкін" деп дабыл қағып отыр.

"Ауа температурасының былай ысуы тым ерте басталды. Биыл жаз айларына жасалған болжамды білмеймін. Бірақ әдетте жыл сайын шілде айында сынап бағанасы 50 градустан жоғары көтерілмейтін", - дейді саябақ өкілі Эбби Уайнс.

Еске сала кетсек, бүгін еліміздің бірнеше өңірінде ауа райына байланысты ескерту жарияланды.

Күндіз Қызылорда, Маңғыстау, Атырау, Павлодар, Қарағанды облыстарында, Алматы, Түркістан облыстарының кей жерлерінде, Батыс Қазақстан облысының оңтүстігінде 42 градусқа дейін баруы мүмкін аптап ыстық күтіледі.

Қызылорда, Түркістан, Ақтөбе облыстарында, Жамбыл, Алматы, Қостанай, Ақмола, Павлодар, Қарағанды облыстарының кей жерлерінде, Шығыс Қазақстан, Батыс Қазақстан облыстарының жекелеген аудандарында төтенше өрт қаупі сақталады.

Мақаланың түпнұсқасы: https://kaz.nur.kz/kaleidoscope/1918274-aqs-tagy-azal-angarynda-aua-temperaturasy-567-gradusqa-deiin-koterildi/