RU

Прокурорлар бас сауғалап жүр: Тәліптер түрмедегі қылмыскерлерді босатып жіберген

Ауғанстан
Көрнекі фото: Paula Bronstein/Getty Images

Ауғанстанның құлатылған үкіметі тұсында жұмыс істеген прокурорлар өмірі үшін алаңдаулы. Олар түрмеден босатылған қылмыскерлер кек алады дейді. Бұл туралы Centralasian.org қызметі хабарлады.

Қазір экс-прокурорлар бас сауғалап жүр. Оларды тәліптер түрмеден босатқан адамдар іздеп жүрген көрінеді. Елді басып алған "Талибан" қозғалысы барлық түрмедегі тұтқындарды босатқан. ​

Азаттық радиосының ауған қызметіне Ауғанстандағы адвокаттар түрмедегі тұтқындарды босатқан күні үш прокурор өлтірілгенін жеткізген.

"Талибан" қозғалысы тұтқындар ешкімнен кек алмайды деп мәлімдеген. Бірақ бұрынғы шенеуніктердің өліміне тәліптер ешқандай пікір білдірмеді.

Кабулда осыған дейін прокурор болып жұмыс істеген Жәмила (аты-жөні өзгертілген) есімді әйел қазір елден кетуге әрекет жасап жатқанын айтады.

"Ақпарат құралдары біздің үнімізді әлемге жеткізсе екен деймін. Халықаралық қауымдастық бізді шығарып алуға қол ұшын беруі керек", - дейді ол.

Ұлыбритания бірқатар сот және прокуратура қызметкерлерін Ауғанстаннан шығарып алған.

Мақаланың түпнұсқасы: https://kaz.nur.kz/kaleidoscope/1933588-prokurorlar-bas-saugalap-zur-talipter-turmedegi-qylmyskerlerdi-bosatyp-zibergen/