Ақшақар киімін қалай қолдан жасауға болады

Жаңа жыл қарсаңында ертеңгіліктерге қызу дайындық басталады. Бүгінде дүкен сөрелерінде жаңажылдық костюмдердің түр-түрі толып тұр десек те, оның бағасы әркез көңілден шыға бермеуі мүмкін. Мәселен, Ақшақар костюмін қолдан жасап алсаңыз, ақша да үнемделеді, қызыңыз да қатарластарынан ерекшеленіп тұрады. Олай болса жаңажылдық ертеңгілікке лайықталған Ақшақар киімін қалай қолдан жасауға болатыны жөнінде кеңестер ұсынып көрейік.

Жаңа жылда Ақшақар болуды армандамайтын қыз жоқ шығар. Олай болса, қызыңызға өмірінде бір рет өзін Ақшақар сезініп көру бақытын сыйлай аласыз. Ол үшін сізге:

• ақ немесе көгілдір түсті көйлек: ұзын, етегі кең көйлек болса, тіпті жақсы;
• қолдан жасалған қар ұлпалары (жасанды қар ұлпасын желтоқсанда дүкеннен тауып алу қиынға соқпайды, қиялға еріп беріп, қолдан да жасап алуға болады);
• ақ не күміс түсті жаңажылдық жылтырақ;
• мақта қажет.

Дайын көйлекке қар ұлпаларын жабыстырып, етегі мен жеңіне ақ немесе күміс түсті жылтырақты не болмаса мақтаны айналдыра тігіп шығуға болады. Күміс түсті жылтырақты белдік ретінде беліне орап қоямыз.

Ал Ақшақардың бас киімін дүкеннен сатып алуға не болмаса қатырма қағаздан қолдан жасап алуға болады. Ол үшін қатырма қағазға бас киімнің үлгісін сызып, қиып алып, оған ақ фатин немесе ақ, көгілдір түсті басқа да матаны жабыстыру қажет. Дайын болған бас киімге ыстық желіммен қар ұлпаларын, жылтырақтар жабыстырып, жиегін өрнегі бар жеңіл лентамен көмкеріп қоюға болады. Бас киімді шашқа тағатын жуан шеңберге желімдеп қойсаңыз, тағуға ыңғайлы болады. Ақ немесе күміс түсті туфли образды аша түседі.

Ақшақар бас киімін әзірлеудің екінші тәсілі

Ақшақар киіміндегі басты элемент – бас киім. Оны қолда бар материалдардан үйде өзіңіз-ақ тігіп алуыңызға болады.

Бас киім әзірлеуге қажет материалдар:

• иілгіш келетін жеңіл темір;
• қағаз;
• тор мата;
• жіңішке жылтырақ жиектеме;
• жылтырақ моншақтар;
• әртүрлі пішіндегі жылтырақ тастар.

Алдымен иілгіш темірден, қағаздан және тор матаны екі қабат етіп алып, бас киімнің каркасын әзірлеп аламыз.

Қағазды осы карка өлшеміндей етіп кесіп алып, қағаздың көмегімен тор матаның жиегін тігіп шығамыз, бірақ қағазды суырып алу үшін бір жақ шетін тікпейміз.

Дайын болған тор матамен бас киім каркасын қаптаймыз.

Тор қаптап болған соң, жиегін тігіп, бас киімді жіңішке жылтырақ жиектемемен, жылтырақ тастармен сәндейміз.

Шілтерден бас киімнің маңдайшасын және жеке тұсына қалпақ тігуге болады.

Оны да жиектемемен, жылтырақ тастармен, моншақтармен безендіреміз.

Мәтіннен қате тапсаңыз, бізге жазыңыз