Қазақстанда доллар күрт қымбаттап кетті

Сауда-саттық қорытындысы бойынша бүгін теңгенің 1 долларға қатысты бағамы күрт қымбаттады деп хабарлайды Қазақстанның қор биржасынының (KASE) ресми сайты.

Доллар бағамы 20 сәуірмен салыстырғанда бірден 2,10 теңгеге өскені белгілі болды.

АҚШ долларының орташа бағамы 431,93 теңгені құраған.

Ұлттық банктің 21 сәуірдегі ресми бағамы: 1 доллар - 429, 76 теңге.

Сонымен қатар, NUR.KZ порталының арнайы парақшасындағы айырбастау бағамына сәйкес, Алматыда айырбастау пункттерінде 1 доллар 432,5-тен 434,5 теңгеге дейін сатылса, сатып алу -. 430,9 - 431 аралығын көрсетіп тұр.

Ал Нұр-Сұлтандағы ақша айырбастау пунктерінде доллар 432,07 теңгеге сатылып жатыр, сатып алу құны – 430,91 теңге.

Естеріңізге сала кетейік, кеше Қазақстан үкіметі әлеуметтік-экономикалық дамудың 2021 жылға арналған болжамының көрсеткіштері мен индикаторларын қайта қараған болатын.

"2021 жылы жалпы ішкі өнімнің нақты өсуі – 3,1%, мұнай бағасы – бір баррель үшін 50 доллар,  ұлттық валюта бағамы бір доллар үшін 425 теңге деңгейінде болжанып отыр", - деді Мамин үкімет отырысында.

Оның сөзінше, 2021 жылға арналған нақтыланған бюджет шығыстары негізінен "Nur Otan" партиясының бағдарламасы мен президенттің 2020 жылы 1 қыркүйектегі жолдауын іске асыруды қамтамасыз етеді. 

Сонымен қатар бұл шығыстар пандемиямен күрес шараларын қаржыландыруға және денсаулық сақтау жүйесін жаңғыртуға, сондай-ақ экономиканың нақты секторын ынталандыруға бағытталған.

Ұлттық банктің болжамына сүйенсек, 2021 жылы экспорт 10,8 миллиард долларға, яғни 52,2 миллиард долларға дейін ұлғаяды. Импорт 37,1 миллиард долларды құрайды. Инфляция бұрын бекітілген 4,0-6,0 пайыз дәлізде сақталды.