RU

Қазақстандықтарға өз еркімен кредиттен бас тарту құқығы берілуі мүмкін

Фото
Көрнекі фото: pixabay.com

Елімізде кредит рәсімдеуден ерікті түрде бас тарту жүйесі енгізілуі мүмкін деп хабарлайды Sputnik Қазақстан.

"Агенттік азаматтардың қарыз алуға "ерікті түрде тыйым салу" құқығын іске асыру мүмкіндігін қолдайды. Келісілген позицияны әзірлеу үшін агенттік Ұлттық банкпен, "Қазақстан қаржыгерлері қауымдастығы" ЗТБ-мен және кредиттік ұйымдармен бірлесіп кеңес өткізді, жиын барысында қатысушылар ұсынылған бастаманы қолдады", - деді Қаржы нарығын реттеу және дамыту агенттігі Айгүл Құспанның депутаттық сауалына берген жауабында.

Бұл тетікті енгізу үшін азаматқа жазбаша тыйымды басқаруға мүмкіндік беретін процесті толығымен реттеу керек.

Сонымен қатар "ерікті түрде тыйым салуды" тіркеу "бір терезе" арқылы ма, жоқ әлде кредиттік ұйымдар арқылы орталықтандырылып жүзеге асырыла ма, соны пысықтау қажет.

Агенттік "ерікті тыйымды" енгізу мынадай тәуекелдерге алып келуі мүмкін екенін ескертті:

  • клиент ақшадан қысылып, өзі кредит алғысы келсе, кредиттік ұйымға барып, тыйым салуды алып тастау үшін өтініш жазуы керек. Бұл белгілі бір уақытты алады. Осы кезде алаяқтар немесе алаяқтармен сөз байласқан кредиттік ұйымдардың қызметкерлері клиенттің тыйымын өз бетінше алып тастап, оның атына жаңа қарыз рәсімдеп жіберуі әбден мүмкін.

Айта кетейік, осыған дейін мәжіліс депутаты Айгүл Құспан қазіргі уақытта елімізде кредит алаяқтары көбейіп кеткеніне алаңдады. Ол проблеманы шешу жолы ретінде халыққа кредит рәсімдеуден "ерікті түрде бас тарту" құқығын беруді ұсынды.

Мақаланың түпнұсқасы: https://kaz.nur.kz/nurfin/1916514-qazaqstandyqtarga-oz-erkimen-kreditten-bas-tartu-quqygy-berilui-mumkin/