RU

Нұр-Сұлтан әкімдігі әлеуметтік пәтерлердің берілуіне қатысты жағымды жаңалықпен бөлісті

Пәтер
Көрнекі сурет: Елорда әкімдігі

Нұр-Сұлтанда әлеуметтік пәтерлер саны 5,5 есе артады. Осындай жағымды жаңалығымен бөліскен елорда әкімдігі ресми сайтында биыл кезекте тұрғандар үшін салынатын пәтерлер санын да жария етті деп хабарлайды KAZ.NUR.KZ порталы.

Нұр-Сұлтан әкімдігі биыл кезекте тұрғандар үшін 10 мың әлеуметтік жеңілдікті пәтер салынатынын мәлімдеді.

Мұндай пәтерлер кезекке сәйкес бөлінеді. Әлеуметтік жеңілдікті тұрғын үй әлеуметтік осал санаттарға арналған. Олардың қатарында ерекше қажеттіліктері бар балаларды тәрбиелеп отырған аналар, жетім балалар, толық емес отбасылар, көпбалалы отбасылар, мүгедектер, зейнеткерлер, ҰОС қатысушылары және т.б. бар.

Әлеуметтік пәтерлер кезекте тұрған Отбасы банкінің салымшыларына арналған. Сондай-ақ, әкімдік жастар, ерекше қажеттіліктері бар балаларды тәрбиелеп отырған отбасылар, көпбалалы және басқа да санаттар үшін дайын пәтерлерді сатып алатынын хабарлады.

Мұқтаж жандарға пәтер кілттері жыл бойы беріледі. Мысалы, 2018 жылы 1800 әлеуметтік пәтер, 2019 жылы 2900 әлеуметтік пәтер салынса, 2020 жылы 7 мың жеңілдікті пәтер қолданысқа беріліпті.

"Ал биыл мемлекет басшысының тапсырмасы бойынша қолжетімді тұрғын үй саны артып, 10 мың әлеуметтік пәтер салынады. Тек соңғы үш жылдың ішінде әлеуметтік пәтерлер саны 5,5 еседен астам артатын болады. Мұқтаж отбасылар кезекті үй кілтін биыл шілде айында алады", - деп жазды әкімдік баспасөз хабарламасында.

Әлеуметтік қолжетімді тұрғын үй құрылысы қаланың барлық ауданында жүргізілуде. Мысалы, Отау, Жағалау шағын ауданында, Пригородный тұрғын алабында, Ш.Құдайбердіұлы, Р.Қошқарбаев көшелерінде, жаңа вокзал ауданында және т.б.

Сонымен қатар, биыл елбасының бастамасымен қолға алынған "Жұмыс істейтін жастарға жалға берілетін тұрғын үй" бағдарламасы да жалғасатын болады дейді әкімдіктегілер.

"Осы бағдарлама аясында жыл соңына дейін тағы бір мыңнан астам жас баспаналы болады. Осы мың пәтерден бөлек, биыл жыл басында 350 жас баспаналы болды. Сонымен қатар 2021 жылы жастар үшін арнайы тұрғын үй бағдарламасы (әлеуметтік кредиттеу) іске қосылады", - дейді елорда әкімдігі.

Сондай-ақ, қазақстандық тұрғын үй компаниясы (ҚИК) желісі бойынша тұрғын үй бағдарламасына қатысушылардың санаты кеңейтілгені хабарланды. Енді бұл бағдарламаға медицина қызметкерлері, педагогтар, әлеуметтік қызметкерлер, өрт сөндірушілер, тәртіп сақшылары, мәдениет және спорт қайраткерлері қатыса алады. Бұдан басқа, тұрғын үй сертификаттарының сомасы 1-ден 1,5 млн теңгеге дейін ұлғайтылды. Ал тұрғын үй сертификатын алушылардың санаты кеңейтілді.

Әкімдік, одан бөлек қауіпті көппәтерлі тұрғын үй кешендерін жөндеу, ескі және авариялық тұрғын үйлерді бұзу, көпқабатты тұрғын үйлердің құрылысын аяқтауға қатысты жұмыстар жүргізіліп жатқанын алға тартты.

"Мәселен, өткен жылы елордада 50-ден астам көппәтерлі тұрғын үй кешені жөнделді. Соңғы екі жылда апатты жағдайдағы ескі үйлерден 400-ден астам отбасы көшірілді. Биыл тағы да 200-ден астам отбасын көшіру және олар үшін жайлы, ал ең бастысы өмір сүру үшін қауіпсіз жағдай жасау жоспарланып отыр.

Сондай-ақ, үлестік құрылыс нысандарын аяқтау жұмыстары жүргізілуде. Бір жарым жыл ішінде (2019 жылдың жазынан 2020 жылдың соңына дейін) ұзақ құрылыс саны екі еседен астам азайды. Биыл 50-ден астам көппәтерлі тұрғын үйлердің құрылысын аяқтау жоспарлануда. Көптен күткен пәтер кілтін тағы 7 мың үлескер алады", - деп жазды Нұр-Сұлтан әкімдігі.

Мақаланың түпнұсқасы: https://kaz.nur.kz/nurfin/1917237-nur-sultan-akimdigi-aleumettik-paterlerdin-beriluine-qatysty-zagymdy-zanalyqty-bolisti/