Үй жалдау субсидиясын алуға өтініш бергендердің несие тарихы тексеріле ме

Тұрғын үй жалдау субсидиясын алуға өтініш берушілердің несие тарихы тексерілмейді. Бұл туарлы "Хабар" телеарнасындағы "Бүгін" бағдарламасында белгілі болды, деп хабарлайды ҚазАқпарат.

Басылымның мәліметінше, бағдарлама барысында тұрғын үй субсидиясын алуға өтініш бергендердің төлем қабілеті қалай тексерілетіні айтылды.

"Өтініш берушілерге төлем қабілетін растау керек. "Баспана маркет" порталына өтінім бергеннен кейін төлем қабілетін банк автоматты түрде есептейді. Яғни, дереккқорлардан бүкіл ақпарат алынады. Оның ішінде сіздің айлығыңыз, барлық төлемдеріңіз, еңбек демалысының өтемақысы болса, соның бәрі кіреді.

Кәсіпкер ретінде тіркелген болсаңыз, кәсіпкерлік табысыңыз кіреді. Сол отбасы алатын зейнетақы мен әлеуметтік төлемдер де төлем қабілеті ретінде есепке алынады. Осы табыстың бәрін жан басына шағып, 6 айдың ішіндегі табысын есептейді", - деді "Отбасы банк" акционерлік қоғамы орталық филиалының директоры Жансұлтан Матай.

Бағдарлама барысында "Тұрғын үй жалдау субсидиясын алғысы келетін отбасының несие тарихы жағымсыз болса, не істеу керек?" деген сауал қойылды.

Бұл сұраққа Жансұлтан Матай "Несие тарихы қаралмайды" деп жауап берді.

Еске сала кетсек, бұған дейін Индустрия және инфрақұрылымдық даму министрлігі баспанаға аса мұқтаж азаматтардың тұрғын үйді жалға алу құнының 50 пайызын төлеу тетігін әзірлегенін жазған едік.