Ұлттық банк валюта айырбастау операцияларына қатысты мәлімдеме жасады

Ұлттық банк ресми сайтында қолма-қол шетел валютасымен айырбастау операцияларын жүргізген уақытта Қазақстан республикасының заңнамасын сақтау қажеттігін еске салды.

Қаржы ұйымының мәліметінше, қолданыстағы заңнамаға сәйкес, ел аумағында қолма-қол шетел валютасын айырбастау операцияларын тек екінші деңгейлі банктер мен өздеріне берілген лицензия негізінде банктік емес айырбастау пункттері ғана жүргізуге құқылы.

"Қолма-қол валюталарды жоғарыда көрсетілген валюта айырбастау пункттері арқылы айырбастау – қаржы қызметін пайдаланушылар құқығының қорғалуын қамтамасыз етеді", - дейді Ұлттық банк.

Сондай-ақ, Ұлттық банк тиісті лицензиясыз айырбастау операцияларын жүргізу заңсыз кәсіпкерлік түріне жататындығын, ол үшін әкімшілік құқықбұзушылық туралы кодекстің 155, 463-баптары және Қылмыстық кодекстің 214-бабы бойынша әкімшілік және қылмыстық жауапкершілік қарастырылғанын еске салады.

"Заңсыз делдалдар, оның ішінде интернет пен әлеуметтік желілер арқылы айырбастау операцияларын жүргізуді ұсыну – заңсыз саналады және жалған монета жасаушылармен мәміле жасау қаупін тудырады", - дейді қаржы ұйымынан.

Осы орайда Ұлттық банк жұмыс істеп тұрған банктік емес айырбастау пункттерінің мекенжайы мен қосымша ақпараттарды ҚҰБ-тың сайтынан алуға болатынын атап өтті.

Сонымен қатар, Ұлттық банк қазіргі уақытта ел аумағында валюта айырбастаудың, төлем карточкаларын пайдалану, онлайн-банкинг секілді балама түрлері де қарастырылған, олар әлдеқайда қолжетімді екенін әрі 24/7 режимінде қызмет көрсететін еске салды.