1 қыркүйектен бастап балабақша тәрбиешілерінің жалақысы 30 пайызға өседі

Оқу-ағарту министрлігі 2023 жылғы 1 қыркүйектен бастап балабақша тәрбиешілерінің жалақысы тағы 30 пайызға өсетінін мәлімдеді. Бұл туралы KAZ.NUR.KZ ведомствоның Telegram-дағы арнасына сілтеме жасап хабарлайды.

Оқу-ағарту министрлігінің мектепке дейінгі білім департаментінің хабарлауынша, мемлекет басшысының тапсырмасымен 2020 жылдың қаңтарынан 2023 жылдың қаңтарына дейін тәрбиешілердің жалақысы жыл сайын 25 пайызға өскен.

"2023 жылғы 1 қыркүйектен бастап тағы 30 пайызға өседі. Осылайша, еліміздегі 97 мыңнан астам педагогтің жалақысы 2,5 есеге артады", - делінген хабарламада.

Мектепке дейінгі білім департаменті директорының айтуынша, мемлекет басшысының қолдауының арқасында жүзеге асырылатын педагогтердің жалақысын жыл сайын арттыру оң нәтиже берді.

"Мектепке дейінгі білім беру жүйесінің кадрлық әлеуетін күшейту мақсатында оларды даярлау, біліктілігін арттыру және аттестаттау жүйесін жетілдіру, әлеуметтік мәртебесі мен жалақысын арттыру бойынша министрлік жүйелі жұмыс жүргізуде. Мектепке дейінгі, орта, техникалық және кәсіптік білім беруді дамытудың 2023-2029 жылдарға арналған тұжырымдамасы қабылданды. Әдістемелік кабинеттер жанынан мектепке дейінгі тәрбие мен оқыту педагогтеріне әдістемелік көмек көрсету үшін мобильді топтар құрылды", - дейді департамент директоры Наталья Жұмаділдаева.

Ведомство мәліметінше, "Мектепке дейінгі тәрбие және оқыту" бағыты мен мамандығы бойынша кадрлар даярлау 39 жоғары оқу орны мен 119 колледжде жүзеге асырылады. Колледждер өңірлік ерекшеліктерді ескере отырып, мектепке дейінгі ұйымдармен бірге "Педагог" кәсіби стандарты негізінде білім беру бағдарламаларын әзірлейді және оқу бағдарламалары мен жоспарларын жаңартады.

Сонымен қатар Оқу-ағарту министрлігі педколледждерге қойылатын біліктілік талаптары қайта қаралып, биыл мектепке дейінгі білім берудің 20 мыңнан астам педагогі біліктілікті арттыру курстарынан өтетінін атап өтті.