Депутат мобильді аударымдарды 1,5 млн теңгеден бастап тексеруді ұсынды

Мәжіліс депутаты Ерлан Барлыбаев бүгін палатаның жалпы отырысында азаматтардың мобильді аударымдардарын мониторингілеудің қолданыстағы тетігін сынға алды, деп хабарлайды KAZ.NUR.KZ.

Депутат Ерлан Барлыбаев ҰЭМ басшысы Нұрлан Байбазаровтың атына жолдаған сауалында жыл басынан бері қоғамда мобильді төлемдерді толық бақылау бойынша жаңашылдық белсенді талқыланып жатқанын атап өтті.

"Шенеуніктердің көңілге қонбайтын түсіндірмелері жұртты одан сайын шатастырады. (...) Үкіметтің түсіндірмесіне сәйкес, бір ай ішінде 100 және одан да көп адамнан аударым алу бақылауға алынады, олардың жалпы сомасы 3 ЕТЖ немесе 255 мың теңгеден асады.

Бұл жағдайда аударымдардың төменгі шегі нақтыланбаған, бұл барлық төлемнің, тіпті 100-200 теңгедегі шағын аударымдардың да түбегейлі мониторингі жүргізіледі дегенді білдіреді. Бюджетке еш пайдасы жоқ, бірақ шағын бизнес пен өзін-өзі жұмыспен қамтығандардың бас ауруына айналатын қажетсіз бюрократия мен әкімшілендіру қаупі бар", - деді ол.

Мәжілісмен Ресейде 2020 жылдан бастап мобильді төлемдерді мониторингілеудің басқа әдістемесі сәтті қолданылып келе жатқанын атап өтті.

Бұл елде, оның айтуынша, күніне 30-дан астам ақша аударымын алатын адамдар бақылауға алынады, ал әр төлем 1 мың рубльден асуы керек, ал мұндай төлемдердің жалпы сомасы айына 1 миллион рубльден асуы керек.

"Бизнестің салықтарды төлеу міндетін түсіне отырып, мониторингке ілінетін төлемнің төменгі шегін – кемінде 3-5 мың теңге деп белгілеу қажет деп санаймыз. (...) Сондай-ақ мобильді төлемдердің мониторингін тек 1,5 млн теңгеден бастап жүргізуді ұсынамыз. Сондай-ақ ШОБ-ты бюрократиядан қорғау үшін мониторингке ілінетін мобильді төлемдерден бөлшек салықты автоматты түрде өндіріп алуды енгізуді ұсынамыз", - деді депутат.

Оның айтуынша, бұл кәсіпкерлерді бухгалтерлік есеп пен басқа да есептілікті жүргізу қажеттілігінен босатады, бюджет төлемдерді қазіргі режимде алады, ал салық органдарында бизнесті тексеруге ешқандай себебі де болмайды.

Айта кетейік, Қазақстанда ақша аударымдарын салықтық реттеу мәселесі 2021 жылы талқыланған болатын. Сол кезде қаржы министрлігі белсенді кәсіпкерлік қызметті атқарып жүрген адамдардың ғана аударымдарына салық салынатынын, аударым жіберушіден ештеңе ұсталмайтынын айтқан еді.

Алайда кейінірек, 2022 жылы ведомство мобильді аударымдар бизнес үшін кірісті жасырудың тәсілі екенін, ал салық салу идеясы осы мәселені шешуге бағытталғанын мәлім етті. Сонымен қатар бұл бастама салықтың жаңа түрі емес екені айтылды.

Былтыр сәуір айында қаржы министрлігі азаматтардың ақша аударымдарын тексеру туралы бұйрықты бекітті. Мобильді аударымдарды тексеру туралы Қаржы министрінің бұйрығын іске асыру кезең-кезеңімен жүзеге асырылады және мемлекеттік қызмет атқармайтын қарапайым азаматтарға қатысты болмайды.

Кейін салық органының өкілі үш ай қатарынан 100-ден аса тұлғадан мобильді аударым қабылдау бойынша бұзушылық анықталған жағдайда қандай шара қолданылатынын айтқан еді.