Қазақстандықтар арзан жалдамалы баспана үшін жылына 600 мыңнан жинауға міндеттелмек

Сатып алу құқығынсыз тұрғын үйді жалға беру бағдарламасына қазақстандықтарды ақша жинауға міндеттейтін өзгерістер енгізілмек. KAZ.NUR.KZ қатысушылардың минималды қанша сома табуға тиіс болатынын сұрап білді.

Тұрғын үйді жалға беру нарығындағы қазіргі бағаларды ескерсек, үйді жалға алу және өз үйіңе ақша жинау өте қиын. Көптеген қазақстандық барлық шығындарын өтегеннен кейін, ипотекаға бастапқы жарнаға жұмсауға жеткілікті ақша жинай алмайды.

Бұл мәселені шешудегі нұсқалардың бірі – халықтың әртүрлі санаттары үшін сатып алу құқығынсыз тұрғын үйді жалға берудің мемлекеттік бағдарламалары. Ай сайынғы жалдау ақысы әдетте коммуналдық қызметтерді қоспағанда 5 000 теңгеден 15 000 теңге аралығында.

Бұл ретте қазір жұмыс істейтін жастарға сатып алу құқығынсыз жалға берілетін тұрғын үй беру шарттарын қатайту мүмкіндігі қарастырылуда. Жастар және отбасы істері комитеті "Ашық НҚА" порталында тиісті бұйрық жобасын әзірлеп, жариялады.

Мұнда сатып алу құқығынсыз жалға берілетін тұрғын үй беру туралы шарт жасасқан немесе ұзартылғаннан кейін қатысушылар бір жыл ішінде жинақтауға тиіс ең төменгі сома бекітілді. Ол 170 айлық есептік көрсеткішті (АЕК) немесе 2024 жылы 627 640 теңгені құрайды.

Яғни қазақстандықтар бағдарламаға қатысудың бірінші жылында өздерінің арзан жалдау ақысын тағы бір жылға ұзарту үшін осы шекті жинақтауы керек. Келесі жылдары ең төменгі сома АЕК-тің өзгеруіне байланысты әртүрлі болатынын атап өткен жөн. Бағдарламаға барлығы үш жылдан аспайтын мерзімге қатысуға болады. Қайталап қатысуға рұқсат етілмейді.

Бір қызығы, ережеде ақшаны тек тұрғын үй құрылыс жинақ банкінде ғана сақтауға болатыны көрсетілген – қазіргі уақытта Қазақстанда мұндай банк тек "Отбасы банкі". Басқа банктердегі ашық депозиттер есепке алынбайды. Бағдарламаға қатысу үшін құжатта атап өтілгендей, өтініш беруші, уәкілетті орган және банк арасында жұмыс істейтін жастарға сатып алу құқығынсыз жалға берілетін тұрғын үй беру туралы үш жақты шарт жасау қажет болады.

Айта кетейік, бұл түзетулердің барлығы әлі күшіне енген жоқ. Бұйрық жобасы тек 30 сәуірге дейін жалғасатын қоғамдық талқылау сатысында. Сондықтан қазақстандықтар арзан жалдамалы баспанаға ақша жинауға міндеттелді деуге әлі ерте.