Лондонда Қазақстанның МБҚ нарығына инвестиция салу мүмкіндіктері таныстырылды

Қазақстан Ұлттық банкі мен KASE халықаралық инвесторларға елдің мемлекеттік бағалы қағаздарына инвестиция салу мүмкіндіктерін таныстырды, деп хабарлайды KAZ.NUR.KZ.

Лондонда Citibank-тің қолдауымен өткен Kazakhstan Local Debt Market таныстырылымына 50-ден астам компания қатысты. Әлеуетті инвесторлар мемлекеттік бағалы қағаздарға инвестиция салу мүмкіндіктерімен танысты.

"Бұл іс-шара – Қазақстанның МБҚ нарығының мүмкіндіктерін жаһандық инвестиция қауымдастығына таныстыру және халықаралық аренада отандық қаржы құралдарына деген қызығушылықты арттыру үшін жасалып жатқан ауқымды жұмыстың бір тармағы", - деп айтылған реттеуші хабарламасында.

Жиында Ұлттық банк төрағасының орынбасары Әлия Молдабекова, Ұлттық экономика вице-министрі Арман Қасенов және ҚҰБ Монетарлық операциялар департаментінің директоры Нұржан Тұрсынханов баяндама жасады.

Жалпы жиынға қатысқандар негізгі макроэкономикалық үрдістер мен Қазақстан қаржы нарығының қазіргі жай-күйін, сондай-ақ халықаралық инвесторлардың Қазақстанның борыш нарығына әрі қарай қатысу перспективаларын талқылады.