Қазақстанда көлікті аулаға тұраққа қойғаны үшін айыппұл салына ма

Кейбір жүргізушілер көліктерін аулаларда бейберекет қалдырып, тұрғындарға қолайсыздық тудырып жатады. Мұндай жағдайда смартфон арқылы арыз жазуға болады, сонда тәртіп бұзушыларға айыппұл салынады. Бұл туралы KAZ.NUR.KZ хабарлайды.

Арнайы бөлінген тұрақтарда көліктер орындарын бөліп, кіру және шығудың ыңғайлылығын қамтамасыз ететін белгілер болады. Дегенмен аулаларда көліктерді қолайсыз жерде қалдырып, басқа автокөліктерге, тіпті жаяу жүргіншілерге де кедергі жасайтын жүргізушілер кездесіп жатады.

Мұндай әрекет үшін айыппұл арқалау мүмкін екенін есте ұстаған жөн. Қажет кезде қазақстандықтар мұндай тәртіп бұзушылар туралы өздері 102 нөміріне қоңырау шалу арқылы немесе полицияның осы аттас мобильді қосымшасы арқылы хабарлай алады.

Аулада тұраққа қою ережелері

Қазақстан Республикасының жол қозғалысы ережелеріне (ЖҚЕ) сәйкес, аялдама – жолаушыларды отырғызу немесе түсіру, көлік құралын тиеу немесе түсіру үшін бес минутқа дейін және одан да көп уақытқа (қажет болған жағдайда) қозғалысты тоқтату.

Ал тұрақ – көлік құралының жүрісін жолаушыларды отырғызуға немесе түсіруге не көлік құралын тиеуге немесе түсіруге байланысты емес себептер бойынша бес минуттан асатын уақытқа тоқтату.

Жол қозғалысы ережесінің 12-тарауының 87 және 88-тармақтарына сәйкес гүлзарларға, көгалдарға, балалар және спорт алаңдарына тоқтатуға және көлік құралдарын қоюға тыйым салынады.

Ал 85-тармақта жаяу жүргіншілер жүрісіне кедергі келтірмейтін жағдайда жүру бөлігімен шектесетін, оған толықтай не ішінара кіретін тротуардың шетінде, жеңіл автомобильдердің, мотоциклдердің, мопедтердің және велосипедтердің тоқтап тұруына рұқсат етіледі.

Сондай-ақ тұрғындарға қолайсыздық тудыратын жағдайда елді мекендерде қозғалтқышы жұмыс істейтін механикалық көліктерді қоюға тыйым салынатынын есте ұстаған жөн (Жол қозғалысы ережесінің 88-тармағының 5 тармақшасы). Бұл ережелерді бұзғандар әкімшілік жазаға тартылуы мүмкін.

Ауладағы автотұрақ үшін айыппұлдар

Аулада көлік тротуарға (жаяу жүргіншілер қозғалысына кедергі келтіретін), гүлзарға, көгалдарға, балалар немесе спорт алаңдарына қойылған болса, онда қазақстандықтарға 10 АЕК көлемінде айыппұл салынуы мүмкін (ӘҚБтК 597-бабы).

Бұл сома 2024 жылы 36 920 теңге болса, 2025 жылы АЕК пен басқа да көрсеткіштердің өсуіне байланысты ол 39 320 теңгеге дейін жетуі мүмкін. Дәл осындай жаза басқа көліктердің қозғалысына кедергі келтіргені үшін де қолданылады.

Ал бірінші айыппұл салынғаннан кейін 12 ай ішінде тәртіп бұзушылық қайталанса (барлық көрсетілген жағдайларда) сома 15 АЕК – 2024 жылы 55 380 теңгеге және 2025 жылы 58 980 теңгеге дейін артады.

Сондықтан, басқа тұрғындарға қолайсыздық тудырмай, айыппұл арқаламас үшін көрсетілген талаптар мен ережелерді сақтаған жөн.