Сарапшылар Ұлттық банк Қазақстандағы теңге бағамын қалай "тежемек" болғанын айтты

Қазақстан Республикасының ұлттық валютасының АҚШ долларына қатысты күрт әлсіреуі валюта нарығында дүрбелең тудырды. Салдарынан ақша айырбастау орындарында доллар бағамы 527 теңгеге дейін көтерілді, деп жазады KAZ.NUR.KZ.

28 қарашада ақша айырбастау орындарында доллар бағасының күрт көтеріліп, айырбастау орындарында 527 теңгеге, ал валюта биржасында 519 теңгеге дейін жетуі біраз дүрбелең тудырды.

Осы жағдайға байланысты Ұлттық банк теңгенің тұрақтылығын сақтау үшін валюталық интервенциялар жүргізіп жатқанын мәлімдеді.

Валюталық интервенциялар – орталық банктің валюта нарығында ұлттық валютаның бағамын ұстап тұру немесе реттеу мақсатында жасайтын әрекеті. Егер теңге күрт әлсіресе, Ұлттық банк нарықтағы доллар ұсынысын көбейту үшін резервтен доллар сатады. Бұл доллардың бағамын төмендетуге көмектеседі.

Керісінше, теңге шамадан тыс нығайса және оның қымбаттауы ел экономикасына тиімсіз болса, Ұлттық банк нарықтан доллар сатып ала бастайды. Бұл доллар тапшылығын туғызып, оның бағасын арттырады, яғни теңгенің бағамы әлсірейді.

Telegram-дағы Tengenomika арнасы сарапшыларының пікірінше, Ұлттық банктің интервенциялары болмаса, доллар бағамы бұдан да жоғарылап кетуі мүмкін еді.

"Шынын айтқанда, интервенциялар айтарлықтай тиімді болып отырған жоқ, өйткені айырбас бағамы әлі де тұрақтанып үлгерген жоқ. Дегенмен бұл шараларсыз теңгенің бағамы одан әрі құлдырап, доллардың бағасы бақылаусыз өсуі мүмкін еді", - дейді сарапшылар.

Күннің соңына қарай Ұлттық банктің мәлімдемесі мен белсенді валюталық интервенцияларының арқасында доллар бағамы біршама тұрақтанып, биржада 513 теңге деңгейінде бекіді.

Ұлттық банк әрекет етпеген жағдайда, теңгенің құнсыздануы жалғасып, валюта айырбастау орындарында доллар бағасы одан әрі көтерілуі мүмкін еді. Сондықтан интервенциялар теңге бағамын тұрақтандыруға маңызды әсер етті.