2024 жылы қазақстандықтар депозитте қанша ақша жинады

Қазақстан банктерінде жеке тұлғалардың депозиттеріндегі қаражаттың жалпы көлемі 23 трлн теңгеден асты. Оның ішінде ел тұрғындары ұлттық валютада 17 трлн теңгеден астам қаражат жинаған. Толығырақ KAZ.NUR.KZ сайтында.

Қазақстан ұлттық банкінің мәліметіне сүйенсек, 1 желтоқсандағы жағдай бойынша банктердегі жеке тұлғалардың депозиттерінің жалпы көлемі 23 трлн теңгеден асты. Бір ай ішінде бұл сома 1,64 пайызға (371,32 млрд теңгеге) ұлғайды.

Бір қызығы, негізгі өсім шетел валютасындағы депозиттер есебінен болды – бір айда сома 6,58 пайызға өсіп, 5,7 трлн теңгеге жуықтады. Ұлттық валютадағы депозиттер 0,13 пайызға ғана өсіп, 17,4 трлн теңгені құрады.

Бұл үрдіске қараша айындағы теңгенің күрт әлсіреуі ықпал етуі мүмкін. Валюталық депозиттердің өсуі қайта бағалау есебінен болған, өйткені олардың сомасы теңгемен есептеледі. Сонымен қатар, азаматтар өз жинақтарын тұрақты валютада сақтау үшін шетел валютасына көшуі ықтимал.

Жалпы 2024 жылдың басынан бері отандық банктердегі жеке салымдардың жалпы көлемі 15,92 пайызға немесе 3,2 трлн теңгеге өскен.

Қараша айында теңгедегі депозиттердің тартымдылығы аздап төмендеген. ұлттық банктің мәліметінше, жеке тұлғалардың теңгедегі депозиттері бойынша орташа сыйақы мөлшерлемесі 13,2 пайыз болды – өткен аймен салыстырғанда 0,1 пайыздық тармаққа төмен.

Жыл басынан бері мөлшерлеме 0,8 пайыздық тармаққа азайды (14 пайыздан 13,2 пайызға). Қарашада:

• Талап етуге дейінгі депозиттер бойынша мөлшерлеме 0,1 пайызға дейін төмендеді.
• Мерзімді депозиттер бойынша мөлшерлеме 13,2 пайызды құрады.
• Шартты депозиттер бойынша орташа мөлшерлеме 4,8 пайыздан 9,1 пайызға дейін өсті.

Сондай-ақ қараша айында Қазақстан Республикасының Ұлттық Банкі базалық мөлшерлемені бірден 1 пайыздық тармаққа, 15,25 пайызға дейін көтергенін атап өткен жөн.

Бұл жағдай желтоқсанда кейбір банктердің депозиттер бойынша мөлшерлемені көтеруіне әкелді. Бұл нарықтағы орташа көрсеткіштің өсуіне және депозиттердің одан әрі артуына ықпал етуі мүмкін. Жоғары пайыздық мөлшерлемелер азаматтар үшін депозиттерді тартымды ете түседі.