"Барлығын ашық көрсетуді ұсынамыз": декларация тапсырғаннан кейін кімдер тексеріледі

Сенат кулуарында қаржы вице-министрі Ержан Біржанов декларация тапсырғаннан кейін кімдер тексерілуі мүмкін екенін айтып берді. Бұл туралы KAZ.NUR.KZ тілшісі хабарлайды.

"Біз жалпыға ортақ декларациялауды енгізген кезде, осындай тәуекелдер болуы мүмкін деп болжағанбыз. Сондықтан арнайы норма бар, біз бастапқы мәліметтерді тексермейміз. Егер салық төлеуші, бизнес өкілі, жеке тұлға қандай да бір N-санын ашық көрсеткен болса, біз оларға тексеру жүргізбейміз. Бұл заңда бекітілген.

Екіншіден, егер ол осы мәліметтерді көрсетсе де, олар жария етуге жатпайды. Өйткені бұл жабық ақпарат. Яғни ақпараттық қауіпсіздік толық қамтамасыз етіледі. Басқа мемлекеттік органдардың қандай да бір сұранысы бойынша мұндай мәліметтер берілмейді. Жауапкершілік бар, арнайы жүйелер бар және кезең сайын мониторинг жүргізіледі", - деді Ержан Біржанов.

Қаржы вице-министрі қазақстандықтарға декларацияда "барлығын нақты көрсетуге" кеңес берді.

"Үшіншіден, біз тексеруді есеп бергеннен кейін жүргіземіз. Қазір адамдар 250-ші форманы тапсырады, онда оның бастапқы активтері көрсетілген. Егер осы мерзімнен кейін адамның декларациясында көрсетілмеген қандай да бір активтері пайда болса, мысалы, оның декларациясында 100 мың доллар болса, бірақ кейін ол миллиондаған долларға мүлік сатып алса, ал ресми жалақы алмаса, оған міндетті түрде сұрақтар туындайды. Ол бұл ақшаны қайдан алды, қайдан тапты? Мүмкін, ол салықты жасырған шығар. Мүмкін, қандай да бір қылмыстық әрекет жасады ма? Осы сұрақтар қойылатын болады.

Осындай адамдар бақыланады. Сондықтан бастапқы кезеңде барлығын ашық көрсетуді ұсынамыз, мұның ешқандай салдары болмайды. Бірақ болашақта сізге расталмаған мүлік немесе көлік рәсімделсе, фискалдық органдар сұрақтар қояды", - деп қосты Біржанов.

Мұндай жағдайда, қаржы вице-министрінің айтуынша, камералдық бақылау тұлғаға осындай хабарлама жібереді: "Сіз айналымды кеміткен шығарсыз, оны декларацияңызда көрсетіңіз және салық төлеңіз".

Жалпыға ортақ декларациялау аясында салық есебін тапсырудың соңғы мерзімі 15 қыркүйектен 16 қыркүйекке ауыстырылған. Себебі биыл ол демалыс күні.

Мәтіннен қате тапсаңыз, бізге жазыңыз