Қазақстан мегаполистерінің бірінде жылу тарифі төмендейді

Шымкентте жылу тарифі алдағы маусымнан бастап төмендейді. Бұл туралы сыбайлас жемқорлыққа қарсы қызмет өкілдері мәлімдеді, деп хабарлайды 24.kz.

Салаға жасалған талдаудан соң үш жылдан бері орындалмай келген шешім ерекше бақылауға алынып, уақытша өтемдік тарифі қайта енгізілді.

Шымкентте жылу маусымы 150 күнге ұласты. Қала аумағындағы көпқабатты екі мыңнан аса тұрғын үй мен мемлекеттік мекеме сәуір айына дейін жылумен қамтамасыз етілді. Алайда тұтынушылардың кәсіпорын алдындағы берешегі қордаланып, 814 миллион теңгеге жеткен.

"Біз 136 күн емес, 150 күнге жуық қаланы жылумен қамтамасыз етіп жатырмыз. Соның салдарынан қазіргі таңда министрлікке хат жолданған болатын. Яғни жылу маусымын ұзарту туралы мәселе жолданды. Қарастырылып жатыр", - дейді қалалық жылумен қамтушы кәсіпорынның басшысы Асқар Бөлешов.

Жылу орталығының есебіне жасалған талдау нәтижесінде кәсіпорынның негізсіз пайда тапқаны анықталды. Табиғи монопилияларды реттеу департаментінің өкілдері тұтынушылардан соңғы жылдары 486 миллион теңге артығымен жиналғанын мәлімдеді.

Компанияның шығындарын өтеуге жергілікті қазынадан да субсидия бөлінген. Сондықтан заңсыз табысты өтем тарифімен қайтару ұсынылды. Бірақ "Қуат жылу орталығының" өкілдері заң аясында шағымданып, сот шешімін күткен.

"Заңбұзушылық бойынша негізсіз табысқа хаттама толтырылған болатын. Мекеменің ходатайствосына сәйкес, сот орындарына жолданған болатын. Бірінші инстанцияда департамент жеңген болатын және апелляция сотына, жоғарғы сотқа беріліп, департамент бұл істе ұтқан болатын. Осы соттың шешімін орындау үшін мекемеге хаттар жолданған", - дейді қалалық Табиғи монополияларды реттеу департаментінің басшысы Кенжеболат Көшекбаев.

Өтемдік тарифтің мерзімінде енгізілмеуіне байланысты салаға сыртқы талдау жасалды. Бұдан былай төмендетілген жаңа тарифтің енгізілуін сыбайлас жемқорлыққа қарсы қызмет өкілдері бақыламақ.

"Уәкілетті орган да, монополист те уақытша өтемдік тарифті енгізу бойынша тиісті шараларды қабылдамаған. Біздің араласуымыздан кейін Табиғи монополияларды реттеу комитеті департаментімен "Қуатжылуорталық-3" мекемесіне 280 млн теңге көлемінде айыппұл салды", - дейді қалалық Сыбайлас жемқорлыққа қарсы іс-қимыл департаментінің басқарма басшысы Жандос Бекасанов.

Аймақта алдағы жылу беру маусымына дайындық басталды. Мамандар 823 шақырым болатын құбыларды қысыммен тексеріп, 100-ге тарта тұста ақау барын анықтады. Биыл осы ішкі орамдық желілер мен магистралдық жүйелерге жөндеу жасалып, жаңғыртылады.

Авторлары: Нұрсұлтан Мұхамеджан, Самат Нағашбекұлы