Әблязов ісі: Украинада ғалым Кеннет Әлібекке іздеу жарияланды

Украинада Мұхтар Әблязовқа болысқан деп күдіктеліп жатқан Қазақстан Ұлттық медицина холдингінің бұрынғы басшысы Кеннет Әлібекке мемлекеттік іздеу жарияланды. Бұл туралы Tengrinews.kz-ке сілтеме жасаған NUR.KZ хабарлайды.

Ғалым Кеннет Әлібек осы жылдың 13 ақпанында қылмыстық жолмен алынған кірістерді заңдастырды деген күдікке ілінген.

Елдің қылмыстық заңнамасына сәйкес бұл іс үшін сегіз жылдан 15 жылға дейін бас бостандығынан айыру жазасы қолданылуы мүмкін.

Қазір құқық қорғау органдарына күдіктінің мекен-жайы белгісіз. Сол себепті олар Кеннет Әлібекке мемлекеттік іздеу жариялаған.

Осыдан бұрын Қазақстан азаматы Кеннет Әлібектің Мұхтар Әблязовке болысқан деп күдіктеліп жатқаны белгілі болған.

Қылмыстық іс материалдары бойынша тәжірибелі олигарх, Әлібек басқарған "Макс-Велл" фармзауыты арқылы БТА Банкінің ұрланған қаражатын жойып отырған. Осындай тәсілмен заңдастырылған ақшаның жалпы сомасы 15,8 млрд теңгені құраған.

Кейінірек бұл айыптауларға ғалымның өзі де жауап берді. Ол ақталмайтынын, істің анық-қанығын айтып беретінін мәлімдеген.