Дариға Назарбаева шенділерді әлеуметтік желі арқылы есеп беруге шақырды
Опубликовано:
Сенат төрағасы Дариға Назарбаева Ақтөбе облысына жұмыс сапары барысында облыстық мәслихат депутаттарымен кездесті деп жазады KAZ.NUR.KZ.
Назарбаеваның айтуынша, өкілді органдар жергілікті мемлекеттік басқару жүйесінде аса маңызды рөл атқарады. Сенатта аймақтармен ынтымақтастықты арттыруға арналған Жергілікті өкілді органдармен өзара іс-қимыл жөніндегі кеңес жұмыс істейді.
"Біз сенаттың жанында жергілікті өкілді органдармен өзара іс-қимыл жөніндегі кеңес құрдық және оған зор үміт артып отырмыз. Мәслихатпен байланыс тығыз әрі белсенді және екіжақты болғанын қалар едік", - деп атап өтті Дариға Назарбаева.
Сенат басшысының пікірінше, халықпен жұмыс жасаудың жаңа түрі керек болады, жұртшылықтың қатысуымен көшпелі отырыстарды үздіксіз өткізіп, жасалған жұмыстар туралы ресми сайттарда ғана емес, әлеуметтік желілерде де кеңінен жариялау қажет екенін атады.
Назарбаева бұл ретте осы жұмыстар атүсті жасалмай әрі сөз жүзінде қалмай, нақты мазмұнға ие болуы керектігін атап өтті.
Сенат төрағасы ұлттық мәдени орталықтар басшыларымен сол күнгі болған кездесуде аймақтардағы ассамблеялардың мәртебесін нығайтуды, атап айтқанда жастарды мәдени орталықтар жұмысына тарту, сондай-ақ түрлі ұлт өкілдері үшін әлеуметтік лифт жүйесін құру мәселелерін талқылады.
Мақаланың түпнұсқасы: https://kaz.nur.kz/politics/1820830-dariga-nazarbaeva-sendilerdi-leumettik-zeli-arkyly-esep-beruge-sakyrdy/
