RU

Грекияның ең жас депутаты Шымкент тумасы болып шықты

Мария Апатзиди мен Алексей Волков
Мария Апатзиди мен Алексей Волков. Фото: Қазақстан Сыртқы істер министрлігінің ресми сайты

Грек парламенті мүшелерінің арасындағы ең жас депутат Мария Апатзиди Шымкентте дүниеге келген. Қазақстанның Грекиядағы елшісі Алексей Волков депутатпен кездесті деп хабарлайды Сыртқы істер министрлігінің ресми сайты.

СІМ мәліметінше, әңгіме барысында тараптар екіжақты қарым-қатынастардың қазіргі ахуалы мен даму келешегін талқылаған.

Мария Апатзидидің сөзінше, Қазақстанда туған гректер өткен ғасырдың соңында тарихи отанына оралған. Депутат бүгінде Қазақстанда болып жатқан әлеуметтік-экономикалық, саяси, мәдени үдерістерге қызығушылықтың артып жатқанын айтып, екі ел арасында туристер алмасу әлеуетін арттыруға, қос тараптың ынтымақтастығын одан әрі нығайтуға ниетті екенін жеткізді.

Жақында Қазақстанның мәдениет министрлігі мен Грецияның туризм министрлігі туризм саласындағы өзара түсіністік пен ынтымақтастық туралы меморандумға қол қойған. Құжат Марияның партиясы тарапынан толық қолдау тапқан.

Мария Апатзиди
Мария Апатзиди. Фото: Қазақстан Сыртқы істер министрлігінің ресми сайты

Кездесу соңында Волков пен Апатзиди байланысты жалғастыруға уағдаласып, болашақта атқарылатын жұмыстарды нақтылады.

Еске сала кетсек, бұған дейін Әсел Төленова есімді қазақ қызы АҚШ президенті протоколы бастығының орынбасары болып қызмет ететінін жазған едік.

Сонымен бірге Африкада мұғалім болып жүрген қазақ қызы туралы жазған болатынбыз.

Мақаланың түпнұсқасы: https://kaz.nur.kz/politics/1887378-grekiany-e-zas-deputaty-symkent-tumasy-bolyp-sykty/