Мемлекет басшысы Сыртқы істер министріне бірқатар нақты тапсырма берді

Мемлекет басшысы Қасым-Жомарт Тоқаев Сыртқы істер министрі Мұхтар Тілеубердіні қабылдады деп хабарлайды Ақорданың баспасөз қызметі.

Кездесу барысында Қасым-Жомарт Тоқаевқа Сыртқы істер министрлігінің осы жылдың басынан бері атқарған жұмысының негізгі қорытындылары, соның ішінде, өзге елдермен екіжақты ынтымақтастық бойынша және халықаралық ұйымдар аясында өткізілген халықаралық іс-шаралар туралы ақпарат берілді.

Сонымен қатар кездесу барысында президенттің қатысуымен алдағы уақытта өтетін сыртқы саяси іс-шаралар кестесі пысықталып, өңірлік күн тәртібіндегі мәселелері талқыланды.  

Кездесу соңында мемлекет басшысы Сыртқы істер министріне еліміздің стратегиялық әріптестерімен екіжақты іс-қимылдарды дамыту бойынша бірқатар нақты тапсырма берді.  

Айта кетейік, бүгін президент бейне конференция форматында өткен Ұжымдық қауіпсіздік туралы шарт ұйымы Ұжымдық қауіпсіздік кеңесінің сессиясына қатысты.

Саммитке Қасым-Жормат Тоқаевпен қатар Беларусь президенті Александр Лукашенко, Ресей президенті Владимир Путин, Тәжікстан президенті Эмомали Рахмон, Армения премьер-министрі Никол Пашинян, Қырғызстан президентінің міндетін атқарушы Талант Мамытов, сондай-ақ ҰҚШҰ Бас хатшысы Станислав Зась қатысты.

Жиын барысында Қырғызстан президентінің міндетін атқарушы коронавируспен күресте Қырғызстанға қолдау көрсеткен мемлекеттерге ризашылығын білдірді. Олардың арасында Қазақстан да бар.