RU

Қазақстанда жаңа комитет құрылды

Көрнекі фото
Көрнекі фото: pexels.com

Үкімет қаулысымен Экология, геология және табиғи ресурстар министрлігіне қарасты Балық шаруашылығы комитеті құрылды деп хабарлайды KAZ.NUR.KZ порталы.

Министрлік мәліметінше, саланың жеке ведомствоға біріктірілуі жақында қабылданған балық шаруашылығын дамытудың 2030 жылға дейінгі мемлекеттік бағдарламасын тиімді жүзеге асыруға, балық өсіру, тұтыну және экспорт көлемін жоспарға сай арттыруға мүмкіндік бермек.

Айта кетейік, мемлекет басшысы 2020 жылдың қыркүйек айындағы жолдауында Қазақстанның балық шаруашылығындағы әлеуеті зор екенін айтып, оны дамытуға аса мән беру қажеттігін мәлімдеген еді.

Еске салайық, елімізде ауыл шаруашылығы министрлігі құрамында болған Балық шаруашылығы комитеті 2014 жылы таратылған.

Одан бері балық ресурстарын қорғау, тиімді пайдалану және көбейту саласындағы мемлекеттік саясатты экология министрлігінің орман шаруашылығы және жануарлар әлемі комитеті жүргізіп келеді.

"Салаға қатысты міндеттердің комитет пен жергілікті атқарушы органдардың және балық шаруашылығындағы өзін өзі басқару субъектілерінің арасында бөлінуі орталықтандырылған түрде тиімді жұмыс істеуге кедергі келтіреді", - делінген хабарламада.

Ал министрлік жұмысты жүйелі түрде жүргізу арқылы мемлекеттік бағдарламада көрсетілгендей су ресурстарындағы балық өсіру көлемін 600 мың тоннаға, балық экспортын 300 мың тоннаға дейін жеткізуге болатынын хабардар етті.

"Қазіргі уақытта жаңа комитеттің алдында мемлекеттік бағдарламаның жүзеге асуына жол ашатын саланы мемлекеттік қолдау аясын кеңейту, заңнаманы жетілдіру, балық жемі өндірісін жолға қою, кадрлық қамтамасыз ету жұмыстарын атқару міндеттері тұр", - деп атап өтті ведомство.

Мақаланың түпнұсқасы: https://kaz.nur.kz/politics/1892725-kazakstanda-zaa-komitet-krylady/