Жандос Бүркітбаев денсаулық сақтау вице-министрі қызметіне тағайындалды

Үкімет қаулысымен Жандос Қонысұлы Бүркітбаев денсаулық сақтау вице-министрі болып тағайындалды деп хабарлайды премьер-министрдің ресми сайты.

Жандос Бүркітбаев 1971 жылы Жамбыл облысында дүниеге келген.

1996 жылы C. Асфендияров атындағы Алматы ұлттық медицина университетін "Емдеу ісі" мамандығы бойынша, 2003 жылы Л. Гумилев атындағы Еуразия ұлттық университетін "Мемлекеттік және жергілікті басқару" мамандығы бойынша, 2007 жылы Оңтүстік Қазақстан мемлекеттік медицина академиясын "Фармация" мамандағы бойынша, 2018 жылы ҚДСЖМ Қазақстан медицина университетін тәмамдаған.

Еңбек жолын 1996 жылы Алматы қалалық жедел медициналық жәрдем клиникалық ауруханасында дәрігер-терапевт болып бастаған. 

Әр жылдары Алматы қаласындағы Республикалық апаттар медицинасы орталығының дәрігері, денсаулық сақтау министрлігінің бас маманы, бөлім басшысы, басқарма басшысы, парламент мәжілісінің Әлеуметтік-мәдени даму комитетінің қызметін қамтамасыз ету бөлімі меңгерушісінің орынбасары қызметтерін атқарған.

2008 жылы Астана қаласы "Қан орталығы" ШЖҚ МКҚК басқарған.

2011-2019 жылдары — Трансфузиология ғылыми-өндірістік орталығының директоры болған. 

2019 жылғы 23 қаңтардан бастап "Ұлттық ғылыми онкологиялық орталық" ЖШС басқарма төрағасы қызметін атқарған.

Айта кетейік, бұған дейін үкімет қаулысымен Ғабидолла Әбдірахымов мәдениет және спорт вице-министрі болып тағайындалған еді.