Семей қаласының басшысы ауысқаны туралы ақпаратқа облыс әкімдігі жауап берді

Әлеуметтік желіде "ШҚО әкімінің қаулысы" ретінде жазылған құжат тарады. Мәтінде Семей қаласының басшысы болып Нұрымбет Сақтағановтың тағайындалғаны жазылған. Ақпаратқа Шығыс Қазақстан облысы әкімінің баспасөз қызметі пікір білдірді деп хабарлайды YK-news.kz.

Қазіргі уақытта Ермак Сәлімов Семей қаласының әкімі. Ал Нұрымбет Сақтағанов Ұлан ауданының басшысы болып қызмет етеді.

Шығыс Қазақстан облысы әкімінің баспасөз қызметі кадрлық ауыс-түйіс туралы ақпаратқа пікір білдірді.

"Тағайындау болған кезде ресми ақпарат жіберіледі. Әкімдер мәслихат сессиясында депутаттардың келісімі бойынша тағайындалады. Бұл мәселе бойынша Семей қаласы мәслихатының сессиясы болған жоқ", - дейді ведомство.

Еске сала кетсек, Семей қалалық мәслихаты депутаттарының медициналық маскасыз әрі арақашықтықты сақтамай түскен суретіне қатысты СҚО санитарлық-эпидемиологиялық бақылау департаменті пікір білдірген еді.

Ведомствоның хабарлауынша, фотосессия жасалған сәтте өңірлік бас санитар дәрігердің қаулысы күшінде болған.

Қаулыда жабық ғимараттарда міндетті түрде маска режимі мен кем дегенде 2 метр әлеуметтік арақашықтық талабы сақталу керек екені жазылған.

Қазір аталған факті бойынша санитарлық дәрігерлер тексеріс жүргізуде.

"Нәтижесі бойынша кінәлі адамдарға ҚР Әкімшілік кодексінің 425 бабы, 1 бөлімі (Халықтың санитариялық-эпидемиологиялық саламаттылығы саласындағы заңнама талаптарын, сондай-ақ гигиеналық нормативтердi бұзу) бойынша әкімшілік сипаттағы шаралар қабылданатын болады", - деп хабардар етті департаменттен.