"Бейнесі ұмытылмайды": Президент Ескендір Хасанғалиевтің жақындарына көңіл айтты

Мемлекет басшысы Қасым-Жомарт Тоқаев аса көрнекті композитор, Қазақстанның халық әртісі Ескендір Хасанғалиевтің отбасы мен жақын туыстарына көңіл айтты деп хабарлайды Ақорда.

Мемлекет басшысы Қасым-Жомарт Тоқаев аса көрнекті композитор һәм жұртқа танымал әнші, Мемлекеттік сыйлықтың иегері, Қазақстанның халық әртісі Ескендір Өтегенұлы Хасанғалиевтің дүниеден өтуіне байланысты оның отбасы мен жақындарына көңіл айтып, жеделхат жолдады.

"Ескендір Өтегенұлын халқымыз қоңыр дауысты әнші және жан тебірентерлік әндер шығарған композитор ретінде өте жақсы көрген еді. Ұзақ жылғы шығармашылық жолында жемісті еңбек етіп, отандық музыка өнерінің дамуына зор үлес қосты. 

Халқымызға 200-ге жуық ән, романс және хорға арналған шығармаларын тарту етті.

Әсіресе, "Атамекен", "Анаға сәлем", "Есіңе ал", "Айналайын", "Әдемі-ау", "Гүлсезім" және басқа да тамаша туындылары көрермен тарапынан жоғары бағасын алды.

Халқымыздың сүйіспеншілігі мен айрықша құрметіне бөленді. Еліміздің өнері мен мәдениетін өркендетуге атсалысып, соңына жарқын із қалдырған Ескендір Өтегенұлының бейнесі ұмытылмайды, есімі халқымыздың жадында сақталады", – делінген жеделхатта.

Еске сала кетсек, бүгін танымал әнші, композитор Ескендір Хасанғалиев өмірден өтті. Суыт хабарды мәдениет және спорт вице-министрі Нұрқиса Дәуешов жеткізді.