RU

Роман Скляр Тоқаевқа Германиядан тартылатын инвестиция туралы айтты

Ақорда
Фото: Ақорда

Мемлекет басшысы Қасым-Жомарт Тоқаев премьер-министрдің орынбасары Роман Склярды қабылдады деп жазады Ақорда.

Кездесу барысында президентке Германиядан инвестиция тартуға, екі елдің бизнес саласындағы ынтымақтастығын одан әрі нығайтуға, Қазақстан экономикасы үшін маңызды саналатын бағыттардағы бірлескен жобаларды іске асыруға қатысты атқарылып жатқан жүйелі жұмыстар жөнінде ақпарат берілді.

Үкіметтің жұмыс тобы осы бағыт бойынша перспективасы бар бағыттар мен жобаларды одан әрі пысықтау үшін тұрақты түрде кездесулер өткізуде.

Сондай-ақ, Қасым-Жомарт Тоқаевқа Қазақстандағы машина жасау саласын дамыту үшін жүргізіліп жатқан кешенді жұмыстар туралы да баяндалды.

Елімізде 119 мың қызметкерді жұмыспен қамтып отырған 3 мыңнан астам машина жасау кәсіпорны бар.

Үкімет аталған саланы қарқынды дамыту мақсатымен отандық машина жасау кәсіпорындарының бәсекеге қабілеттілігін арттыруға, өндірістің көлемін сақтап, өсімін одан әрі қамтамасыз етуге бағытталған қолдау шараларын қабылдауда.

Кездесу қорытындысы бойынша Қасым-Жомарт Тоқаев жүргізіліп жатқан жұмыстардың маңызды екеніне назар аударып, бірқатар нақты тапсырма берді. 

Еске сала кетсек, осыған дейін мемлекет басшысы "ҚазМұнайГаз" ҰК" акционерлік қоғамының басқарма төрағасы Алик Айдарбаевты қабылдаған болатын.

Президентке ұлттық компанияның былтырғы атқарған жұмыстарының нәтижелері туралы есеп беріліп, орта мерзімдегі даму стратегиясы таныстырылды.

Мақаланың түпнұсқасы: https://kaz.nur.kz/politics/1916898-roman-sklyarga-toqaevqa-germaniyadan-tartylatyn-investiciya-turaly-aitty/