Депутат Бағдат Мусиннен телефон кодын ауыстыруға нақты не себеп болғанын түсіндіріп беруді талап етті

Мәжіліс депутаты Берік Дүйсембинов цифрлық даму министрінен телефон кодын ауыстыруға нақты не себеп болғанын түсіндіріп беруді талап етті деп хабарлайды Sputnik Қазақстан.

30 қыркүйек күні мәжілістің жалпы отырысында Берік Дүйсембинов БҰҰ жанындағы Халықаралық электр байланыс одағының Қазақстанға жаңа "+997" дэф-кодын белгілеп беру мәселесін талқыға салды. Енді барлық жерде Қазақстан деген сигнал шығады.

Цифрлық даму министрі Бағдат Мусиннің айтуынша, КСРО тарағанда "+7" халықаралық телефон коды екі елге бірдей бекітіліп кеткен.

Оның сөзіне сенсек, бұдан былай Қазақсанның жеке коды болатынын естіген ұлтжанды азаматтар бұл жаңалықты цифрлық тәуелділіктен арылу және өзіміздің цифрлық төл таңбамызды алу деп қабылдап, қатты қуанған.

Десе де, депутат Берік Дүйсембинов қуанышы көп ұзамай су сепкендей басылғанын айтуда.

"Осы саланы жетік білетін кәсіби мамандардың бұл тақырыпқа байланысты пікірін естіп қуанышымыз су сепкендей басылып, орнына көптеген сұрақ туындап отыр. Сарапшылардың пікіріне сүйенсек, сіз айтқандай "7" саны екі елге бірдей белгіленген код емес, ол тек географиялық аймақтың коды, ал екінші "7" - тек біздің елге бекітілген сан. Яғни, +77 – Қазақстанның жеке коды. Қазақстаннан қоңырау шалған кезде әлемнің әр түкпірінен Қазақстан деген жазу шығу үшін ХЭБ одағына хат жазу жеткілікті", - дейді Дүйсембинов.

Депутат Қытай (+82), Германия (+49), Франция (+33) секілді дамыған елдерде екі таңбалы телефон коды қолданылатынына, ал Қазақстан өз еркімен одан бас тартып, дамушы елдер қолданатын үш таңбалы кодты алуға ниет білдіріп отырғанына баса назар аударды.

"Қазір бұл қатарда Қазақстан да бар еді. Еліміз бұл тізімнен өз еркімен шығып, үш таңбалы Гондурас, Сомали, Конго сияқты елдердің тізіміне қосылудың алдында тұрмыз. Неліктен қазақ үшін қасиетті 7 таңбасын Ресейге сыйға тартуымыз керек?", - дейді депутат.

Сондай-ақ, мамандар үш таңбалы DEF-коды еліміздің болашақ абоненттік базасын едәуір қысқартады деп отыр. Осыған байланысты "Ақ жол" фракциясы Бағдат Мусинге депутаттық сауал жолдап, дамушы мемлекеттер қолданатын үш таңбалы кодқа көшудің нақты себебін түсіндіріп беруді талап етті.

"Құрметті Бағдат Батырбекұлы! Қазақта "аңқау елге арамза молда" деген сөз бар. Біз, әрине, ондай ойдан аулақпыз. Алайда көпшілік сізді министр ретінде ғана емес, өз кәсібінің білікті маманы деп таниды. Сондықтан бұл қойылған сұрақтарымызға атүсті емес, толыққанды кәсіби жауап беруіңізді сұраймыз", - деп түйіндеді Берік Дүйсембинов.