Тоқаев қиын-қыстау заманда қазаққа құшағын жайған түрік халқына алғыс айтты

Түркітілдес мемлекеттер ынтымақтастық кеңесінің VII саммитінде мемлекет басшысы қазақ халқы үшін аса маңызды мәселеге тоқталып, қиын-қыстау замандарда қазаққа құшағын жайған түрік халқына алғыс айтты. Сонымен қатар, Қасым-Жомарт Тоқаев осы елдің мемлекет қайраткері Аднан Мендерестің рухына тағзым етті, деп хабарлайды президенттің баспасөз хатшысы Берік Уәли Facebook парақшасында.

"Мен бүгін тағы бір өте маңызды тарихи оқиға туралы атап өткім келеді. Бұл өткен ғасырдың ортасында тағдыр тәлкегімен тау асып, тас басып, арып-ашып Анадолы жеріне келген мыңдаған қазақ отбасын өз бауырым деп құшақ жайып қарсы алған Аднан Мендерес жөнінде болып отыр.

Ол өткен ғасырдың елуінші-алпысыншы жылдары, он жыл бойы Түркия Республикасының премьер-министрі болған көрнекті мемлекет және қоғам қайраткері.

Қазақтардың осында орнығуына, кәсіп істеп, тамыр жаюына көп жағдай жасаған бірден-бір тұлға болғаны ақиқат.

Осы маңызды жиын өтіп жатқан демократия және бостандық аралының да Аднан Мендерестің тағдырына тікелей қатысы бар.

Мен Қазақстан Республикасының президенті ретінде қазақ халқының атынан Аднан Мендерестің рухына тағзым етіп, құшағы кең барша түрік халқына шынайы алғысымды айтамын", – дейді мемлекет басшысы.

Естеріңізге сала кетейік, 11 қарашада Қасым-Жомарт Тоқаев жұмыс сапарымен Түркияға барды.