Қасым-Жомарт Тоқаев қайта вакциналаудан қашан өтеді

Мемлекет басшысы Қасым-Жомарт Тоқаевтың қайта вакциналаудан қашан өтетіні және қандай екпе салдыратыны белгілі болды. Бұл жөнінде президенттің баспасөз хатшысы Берік Уәли өзінің Facebook парақшасында жариялады деп хабарлайды KAZ.NUR.KZ.

"Президент Қасым-Жомарт Тоқаевтың COVID-19 індетіне қарсы вакцинаны қайта салдыруына қатысты маған көптеген сұрақ келіп жатыр.

Дәрігерлердің кеңесіне сәйкес мемлекет басшысы келесі жылы қаңтар айында қайта вакциналаудан өтеді. Президент халыққа қолжетімді екпелердің бірін салдыратын болады", - деп мәлімдеді Берік Уәли өз жазбасында.

Естеріңізге сала кетсек, бұған дейін мемлекет басшысы Қасым-Жомарт Тоқаевтың Әзербайжан президенті Ильхам Әлиевпен телефон арқылы сөйлескенін хабарлаған едік.

Әңгімелесу барысында президент Ильхам Әлиевті 60 жасқа толған мерейтойымен құттықтап, оның жауапты мемлекеттік қызметіне табыс, бауырлас әзербайжан халқына бақ-береке тіледі.

Қасым-Жомарт Тоқаев Ильхам Әлиевтің қазақ-әзербайжан көпжақты ынтымақтастығын нығайтуға қосқан жеке үлесін жоғары бағалап, екі ел арасындағы стратегиялық серіктестікті одан әрі дамытудың маңызды екенін атап өтті.