Тоқаев Санкт-Петербургке ұшып келді (фото)

Мемлекет басшысы Қасым-Жомарт Тоқаев Санкт-Петербургке жұмыс сапарымен барды, деп хабарлады президенттің баспасөз хатшысы Берік Уәли Facebook желісіндегі парақшасында.

"Президент Қасым-Жомарт Тоқаев Тәуелсіз Мемлекеттер Достастығына мүше мемлекеттер басшыларының дәстүрлі бейресми кездесуіне қатысу үшін Санкт-Петербургке жұмыс сапарымен келді.

Кездесу барысында ТМД-ға мүше мемлекеттердің басшылары Достастық аясында атқарылған бірлескен жұмыстардың қорытындыларын, көпжақты ықпалдастықты дамытудың және Ұйым қызметінің тиімділігін арттырудың перспективаларын талқылайды", – деп жазды Уәли.

Сонымен қатар ол халықаралық және аймақтық күн тәртібіндегі өзекті мәселелерді қарастыру жоспарланып отырғанын атап өтті.

Естеріңізге сала кетейік, 27 желтоқсанда Елбасы Нұрсұлтан Назарбаев та ТМД-ға мүше мемлекет басшыларының бейресми кездесуіне қатысу үшін Санкт-Петербургке ұшып барған болатын.