Нұржан Календаров Жамбыл облысы әкімінің орынбасары болып тағайындалды

Календаров Нұржан Сәбитұлы Жамбыл облысы әкімінің орынбасары болып тағайындалды. Бұл туралы өңірлік әкімдік ресми сайтында хабарлады.

Календеров Нұржан Сәбитұлы 1976 жылы дүниеге келген.

Жамбыл жеңіл және тамақ өнеркәсібі технологиялық институтын "халықаралық экономикалық қатынастар" мамандығы бойынша бітірген.

Еңбек жолын 1997 жылы "Арнабол" жауапкершілігі шектеулі серіктестігінің бухгалтері болып бастаған.

Әр жылдары Зейнетақы төлеу жөніндегі мемлекеттік орталығының Тараз қалалық бөлімшесінде аға маман, Жамбыл облыстық бөлімшесінде бас маман, Жамбыл облысы әкімі аппаратының бас маманы, облыс әкімдігінің қаржы басқармасында бөлім бастығы, басқарма басшысының орынбасары, басқарма басшысы болған.

Сондай-ақ, 2011-2013 жылдары Жамбыл ауданының әкімі, 2013 жылдың маусым-желтоқсан аралығы Қордай ауданының әкімі, 2013-2017 жылдары Тараз қаласының әкімі, 2017-2019 жылдары Жамбыл облысы әкімі аппаратының басшысы, 2019-2020 жылдары облыс әкімінің орынбасары қызметін атқарған.

2020 жылғы маусымнан бастап бүгінге дейін Шу ауданының әкімі болған.