Қасым-Жомарт Тоқаев Мысыр президентін Қазақстанға шақырды

Опубликовано:

Телефон арқылы сөйлесті
Фото: Ақорда

Мемлекет басшысы Қасым-Жомарт Тоқаев Мысыр Араб Республикасының президенті Әбдел Фаттах ас-Сисимен телефон арқылы сөйлесті, деп хабарлайды Ақорда.

Мысыр тарапының бастамасымен ұйымдастырылған жоғары деңгейдегі сұхбат барысында мемлекеттер басшылары екіжақты қатынастардың қазіргі жағдайы мен перспективаларын талқылады.

Қасым-Жомарт Тоқаев қазақ-мысыр қатынастарының тамыры терең болғанымен, екі ел арасындағы заманауи дипломатиялық қатынастардың орнағанына биыл 30 жыл ғана толғанын атап өтті. Осы мерзім ішінде екіжақты ынтымақтастықтың әртүрлі саласы бойынша бірқатар жетістіктерге қол жеткізілді.

Дегенмен, бүгінгі таңда екі ел арасындағы байланыстарының әлеуеті толық пайдаланылмай отырғанына назар аударған Қазақстан президенті мысыр тарапын сауда-экономика саласындағы ықпалдастықты дамытуға шақырды.

Сонымен қатар, мемлекет басшысы қаңтар оқиғаларына қатысты алаңдаушылық танытып, ниеттестік білдіргені үшін Әбдел Фаттах ас-Сиси мен мысыр халқына алғысын жеткізді.

Қасым-Жомарт Тоқаев еліміздегі жағдайдың тұрақталғанын атап өтіп, әлеуметтік-экономикалық қайта құрудың жаңа стратегиясын жүзеге асыру шаралары қабылданғанына тоқталды.

Президенттің айтуынша, Қазақстан халқы болашаққа нық сеніммен қарайды.

Сұхбат соңында Мемлекет басшысы Мысыр президентін Қазақстанға өзіне қолайлы мерзімде сапармен келуге шақырды.

Мақаланың түпнұсқасы: https://kaz.nur.kz/politics/1957799-qasym-zomart-toqaev-mysyr-prezidentin-qazaqstanga-saqyrdy/