Тоқаев Қазақстанның Мысырдағы елшісіне сөгіс жариялады

Мемлекет басшысы Қасым-Жомарт Тоқаев Египет Араб Республикасындағы Төтенше және өкілетті елші Қайрат Лама Шарифке сөгіс жариялады. Бұл туралы Борт №1 Telegram арнасы хабарлады.

"Президент Қасым-Жомарт Тоқаев Қазақстан Республикасы мемлекеттік қызметшілері әдеп кодексінің 9-тармағының талаптарын сақтамағаны үшін Қазақстанның Египет Араб Республикасындағы Төтенше және өкілетті елшісі Қайрат Қайырбекұлы Лама Шарифке сөгіс жариялады", - делінген хабарламада.

Қайрат Лама Шариф аталған лауазымға 2020 жылғы 2 қыркүйекте тағайындалған еді.

Бұған дейін ол Сыртқы істер министрлігі ерекше тапсырмалар жөніндегі елшісі, Біріккен Араб Әмірлігіндегі Қазақстанның төтенше және өкілетті елшісі, Қазақстанның Халықаралық жаңартылатын энергия агенттігіндегі тұрақты өкілі қызметтерін атқарған.